«Եթե պետությունը գործարաններ չունի, անհատներն են գործարանների մասին հոգ տանում: Պատկերացնո՞ւմ եք՝ Գագիկ Ծառուկյանը տասնյակ հազարավոր աշխատատեղեր է ստեղծել եւ պետական ոչ մի կառույցում չի աշխատել»,-ԱԺ նիստում այսօր հայտարարեց ԲՀԿ պատգամավոր Վարդան Ղուկասյանը:
Ազգային ժողովն այսօր քննարկում է ՀՀ գլխավոր դատախազ Արթուր Դավթյանի ներկայացրած միջնորդագիրը՝ ԲՀԿ առաջնորդ Գագիկ Ծառուկյանի հանդեպ քրեական հետապնդում հարուցելու եւ կալանավորումը թույլատրելու հարցով:
Ղուկասյանն այնուհետեւ հիշեցրեց սպորտի բնագավառում Գագիկ Ծառուկյանի միջոցով գրանցված ձեռքբերումները. «Իհարկե, մերոնք հզոր են, բայց Գագիկ Ծառուկյանը կարողացավ հարաբերությունները պահել: Պահեց այնպիսի սկզբունքով, որ այն լորդերին բերեց-հասցրեց Ղարաբաղ: Մնացածն էլ չասեմ: Որ կոնյակի գործարանն ու մնացածը փակվեն վաղը չէ մյուս օրը, ո՞վ է պատասխան տալու դրա համար: Եթե անհատը պետության պարտավորություն է ստանձնում, եւ նման թույլ միջնորդություն են ներկայացնում եւ ուզում նրան վարկաբեկել, նման ճանապարհով երկիր չենք կառուցի»:
Լուիզա ՍՈՒՔԻԱՍՅԱՆ
