Ազգային ժողովն այսօր քննարկում է ՀՀ գլխավոր դատախազ Արթուր Դավթյանի ներկայացրած միջնորդագիրը՝ ԲՀԿ առաջնորդ Գագիկ Ծառուկյանի հանդեպ քրեական հետապնդում հարուցելու եւ կալանավորումը թույլատրելու հարցով:
«Լուսավոր Հայաստանի» պատգամավոր Էդմոն Մարուքյանը Դավթյանից հետաքրքրվեց. «Եթե այն գործով խուզարկությունը, որի ժամանակ հայտնաբերվել են նաեւ այս փաստաթղթերը, եղել է փետրվարին, ինչո՞ւ այն ժամանակ չէիք գալիս ԱԺ՝ Գագիկ Ծառուկյանին անձեռնմխելիությունից զրկելու հարցով: Եթե փետրվարին գայիք, ես ձեզ գուցե որեւէ հարց չտայի»:
Արթուր Դավթյան. «Եթե ես փետրվարին գայի միայն մեկ փաստաթղթով, հարցադրումների պատասխանները չէի ունենա, եւ կասեիք, որ այս փաստաթղթերը նկարած են: Այս ամիսներին քննչական օպերատիվ հետախուզական միջոցառումներ են եղել: Մինչեւ երեկ՝ միջնորդությունը մուտք անելու պահը, ձեռք էին բերվում առանցքային ապացույցներ»:
Էդմոն Մարուքյան. «2017թ.-ի ընտրությունների արդյունքների վերաբերյալ «Ելք» դաշինքը հայտարարեց, որ չնայած զանգվածային ընտրակաշառքներին, չկային դրանց մասին ապացույցներ, որի պատճառով չդիմեցինք ՍԴ-ին: Այդ ժամանակ, երբ օրը ցերեկով մարդիկ հերթ կանգնած՝ փող էին ստանում, որ ընտրեին, դուք գլխավոր դատախազ էիք, բայց երեք տարի առաջ եք գալիս-ասում, որ ընտրակաշառք են բաժանել»:
Կարդացեք նաև
Արթուր Դավթյան. «Իմ այստեղ գալը ժամանակագրության հետ չի կապված, այլ կապված է ապացույցների հետ: Քանի տարի հետո որ դրանք ձեռք բերվեն, այդ ժամանակ էլ գալու եմ»:
Էդմոն Մարուքյան. «Կա՞ ցուցմունք, որ Գագիկ Ծառուկյանն է ասել ընտրակաշառք բաժանել: Եթե մենք՝ ԱԺ-ն, թույլ տանք նրան կալանավորել, բայց պարզվի, որ Ծառուկյանը տեղյակ չի եղել փող բաժանելուց, դուք ի՞նչ եք ասելու խորհրդարանին»:
Արթուր Դավթյան. «Թեկնածուն (նկատի ունի Վազգեն Պողոսյանին.-խմբ.) ցուցմունքում ասել է, որ Գագիկ Ծառուկյանն իրեն հրավիրել է եւ առաջարկել մասնակցել ընտրություններին՝ պայմանով, որ պետք է ապահովի 9 հազար ձայն: Ծառուկյանի հետ պայմանավորվածության համաձայն եւ անհրաժեշտ ծախսերն ապահովելու համար թեկնածուն դիմել է անձանց, որոնք զբաղվել են ֆինանսական միջոցներով»:
Էդմոն Մարուքյան. «Միեւնույնն է՝ բացառված չէ, որ քննության արդյունքում դուք հանգեք իմ նախանշած ելքին, այսինքն՝ դրա արդյունքում կխայտառակեք մի ամբողջ խորհրդարանի, որը թույլ է տվել կալանավորել խմբակցության ղեկավարի: Իսկ ՀՀԿ-ի գրասենյակը խուզարկե՞լ եք, կարող է՝ այնտեղ էլ կան նման թղթեր»:
Արթուր Դավթյան. «Խորհրդարանին խայտառակ անելով պետք չէ վախեցնել պատգամավորներին, խայտառակ անելու ոչինչ չկա: Հիմա անձին մեղադրանք առաջադրելու հարցն ենք լուծում: Ըստ ձեր ասածի՝ ցանկացած փուլում կարող է որպես ելք լինել, օրինակ, քրեական գործի վարույթը կարճելը: Բայց եթե պատկերացնում եք, որ այստեղ դատավճիռ է կայացվում, դա չի բխում տրամաբանությունից: Ոչ միայն ՀՀԿ-ի, այլ ցանկացած կուսակցության գրասենյակ կխուզարկվի՝ օրենքով սահմանված հիմք ունենալու դեպքում»:
Լուիզա ՍՈՒՔԻԱՍՅԱՆ
