Ազգային ժողովն այսօր քննարկում է ՀՀ գլխավոր դատախազ Արթուր Դավթյանի ներկայացրած միջնորդագիրը՝ ԲՀԿ առաջնորդ Գագիկ Ծառուկյանի հանդեպ քրեական հետապնդում հարուցելու եւ կալանավորումը թույլատրելու հարցով:
«Լուսավոր Հայաստանի» պատգամավոր Անի Սամսոնյանը հետաքրքրվեց. «Հայաստանում քրեականացված է ոչ միայն կաշառք տալը, այլ ստանալը: Դուք պատգամավոր Գագիկ Ծառուկյանին ուզում եք մեղադրանք առաջադրել այն բանի համար, որ նա կաշառք է տվել ընտրությունների ժամանակ: Այդ կաշառքը չի տրվել անհասցե, այն տրվել է մարդկանց՝ անուն ազգանուններով եւ հասցեներով, հետեւաբար՝ երկկողմանի գործարքի համար երկու կողմերն էլ պատասխանատվության են կանչվում: Կաշառք ստանալու համար որեւէ մեկին մեղադրանք առաջադրվա՞ծ է»:
Արթուր Դավթյան. «Այս պահին կաշառք ստանալու համար որեւէ մեկին մեղադրանք առաջադրված չէ, բայց, ճիշտ եք, անպայման այս շղթայի մեջ հանցավոր արարք դրսեւորած բոլոր կողմերը կանչվելու են պատասխանատվության: Այսինքն, նրանց արարքներն արժանանալու են քրեաիրավական գնահատականի»:
Անի Սամսոնյան. «Այդ մարդկանց պատասխանատվության կանչելու համար քննչական գործողություններ արվե՞լ են. չէ՞ որ 2017թ.-ին Գեղարքունիքում ԲՀԿ-ին ընտրել է մոտ 8000 ընտրող: Շատ լավ կլինի, որ կաշառք ստացողները եւս ենթարկվեն քրեաիրավական պատասխանատվության, որպեսզի չստացվի, որ կենտրոնացել ենք միայն կաշառք տվողի վրա»:
Կարդացեք նաև
Արթուր Դավթյան. «Վստահ եղեք, որ առերեւույթ հանցանք կատարած բոլոր կողմերն արժանանալու են քրեաիրավական գնահատականի: Բոլորդ շատ լավ հասկանում եք կաշառք տալու-կազմակերպելու արարքների հանրային վտանգավորությունը, բայց այն չի բացառում քրեաիրավական գնահատականի արժանանալը:
Լուիզա ՍՈՒՔԻԱՍՅԱՆ
