Ազգային ժողովն այսօր քննարկում է ՀՀ գլխավոր դատախազ Արթուր Դավթյանի ներկայացրած միջնորդագիրը՝ ԲՀԿ առաջնորդ Գագիկ Ծառուկյանի հանդեպ քրեական հետապնդում հարուցելու եւ կալանավորումը թույլատրելու հարցով:
ԲՀԿ պատգամավոր Իվետա Տոնոյանն Արթուր Դավթյանին ասաց. «Անդերսոնը հեքիաթասացության ոլորտում լուրջ մրցակից ունի, բայց ձեզ չի հաջողվելու համոզել, որ կա փաստաթուղթ, որն անմիջապես առնչվում է Գագիկ Ծառուկյանին: Ինչ վերաբերում է նրա տանն իրականացրած խուզարկություններին, ապա սահմանադրության համաձայն՝ պատգամավորների հանդեպ քրեական հետապնդում կարող է հարուցվել միայն ԱԺ-ի համաձայնությամբ: Ամսի 14-ից Գագիկ Ծառուկյանի բնակարանում եղան խուզարկություններ, նա հրավիրվեց ԱԱԾ, ինչը հիմնավորում է, որ արդեն իսկ նրա հանդեպ քրեական հետապնդում էր իրականացվում: Հիմնավորեք ձեր գործողությունները»:
Արթուր Դավթյան-«Ես ապացույցների շատ փոքր զանգվածը միայն հրապարակեցի, որոնք հիմնավորում են կապը Գագիկ Ծառուկյանի հետ, եւ դրանք բավարար են նրա հանդեպ քրեական հետապնդում իրականացնելու համար: Մեր օրենսդրության պահանջն այն է, որ ես այստեղ թույլտվություն խնդրեմ՝ անձին մեղադրանք առաջադրելու համար: Չկա օրենք, որ խուզարկություն անելու համար ԱԺ-ից թույլտվություն ստանամ, հետեւաբար՝ նախաքննական մարմինը գործել է օրենքի շրջանակում»:
Իվետա Տոնոյան. «2017թ. մամուլում տեղեկություններ կային, որ այս կամ այն գործիչը կաշառք է տալիս, բայ որեւէ գործ չհարուցվեց: Ինչո՞ւ, ասեմ՝ որովհետեւ այսօրվա գործիչների սուպերմարկետներում տեղադրված են Աննա Հակոբյանի հիմնադրամի պաստառները (կարող եք չծվծվալ կողքից…):
Կարդացեք նաև
Արթուր Դավթյան-«Ապատեղեկատվություն է, որ նախորդ ընտրությունների վերաբերյալ զարգացումներ չեն եղել: Դեպքը ցույց տվեք: Բացառված է, որ վարույթ եղած չլինի, իսկ թե դրանով ապացույցներ ձեռք բերվել են, թե ոչ, դա այլ հարց է: Այս գործով Գեղարքունիքի մարզում «Ծառուկյան» դաշինքի գործողություններն են քննարկվում: Չեմ բացառում, որ այս դահլիճում նստած են մարդիկ, որոնք տիրապետում են այլ կեղծիքների մասին տեղեկությունների: Երբ կամենան ցուցմունք տալ, այդ ժամանակ կխոսենք: Այս քրեական գործը մեկ մարզի մասին դեռեւս տվյալներ ունի: Քննության ընթացքը ցույց կտա՝ այլ հանցագործություն կպարզվի՞, թե ոչ»:
Լուիզա ՍՈՒՔԻԱՍՅԱՆ
