Վիրուսի ստեղծած խնդիրների, քաղաքական վերջին զարգացումների շուրջ զրուցում ենք «Պոլիտէկոնոմիա» հետազոտական ինստիտուտի տնօրեն ԱՆԴՐԱՆԻԿ ԹԵՎԱՆՅԱՆԻ հետ։
–Եթե ժամանակին հապաղեցին արտակարգ դրություն հայտարարել, հիմա էլ ամեն ամիս երկարաձգում են, սակայն վիրուսի ողնաշարը չեն կարողանում կոտրել։ ՈՒրեմն ո՞րն է այդ երկարաձգման իրական նպատակը։
-Հիմա արտակարգ դրությունը հայտարարվում է բացառապես քաղաքական նպատակներով։ Արտակարգ դրության այս ամիսների ընթացքում ունեցել ենք վարակակիրների, մահացածների շեշտակի աճ։ Այսինքն, խնդիր է դրված ոչ թե կորոնավիրուսի դեմ պայքարը, այլ այդ պայքարի պատրվակով արտակարգ դրություն հայտարարելը և քաղաքական իշխանության պահպանումն ապահովագրելը։
–Այս տիրույթու՞մ դիտարկենք այն իրադարձությունները, որոնք տեղի ունեցան ԲՀԿ խմբակցության ղեկավարի շուրջ։
Կարդացեք նաև
-Ծառուկյանի շուրջ տեղի ունեցողը ցույց տվեց, որ արտակարգ ռեժիմը հենց քաղաքական նպատակ ունի, որպեսզի արգելվեն խաղաղ հավաքները, ցույցերը։ Եթե նկատել եք, այդ օրը վարչապետը ֆեյսբուքից կորել էր, չէր ասում, որ այդ կուտակումները կարող են բերել համաճարակի տարածմանը։ Իրեն պետք էին ոստիկանական խմբերի մեծ կուտակումներ, ու նրան բացարձակ չէր մտահոգում, որ ոստիկանները, իրար շատ մոտ կանգնելով, կարող են վարակի տարածման պատճառ դառնալ։ Սա արդեն նրան չէր հետաքրքրում, նա լուսանկարներ չէր տարածում իր էջում՝ որպես մեր ժողովրդի «անկազմակերպ» լինելու ապացույց։ Նրան պետք էր, որ ոստիկանները դիմադրեին իր քաղաքական ընդդիմախոսներին։ Մինչ այդ երկրում մեկ՝ կորոնավիրուսի հաղորդիչ էր միացել։ Ստացվել էր այնպես, որ «կորոնավիրուսն ում շունն է» կարգախոս ունեցողը դարձել է արդեն կորոնավիրուսի «երկրպագու» և խոսում է միայն այդ խնդրից։ Կարծես Հայաստանում ոչ սոցիալ-տնտեսական խնդիրներ կան, ոչ արտաքին քաղաքական հարցեր (այս ընթացքում մենք արտաքին հարթակում խայտառակ պարտություններ ենք կրում)։ Էլ չենք խոսում այն մասին, որ տնտեսությունը երկնիշ ցուցանիշներով է անկում ապրում։
–Ո՞րն է ձեր մատնանշած խնդիրներից դուրս գալու ելքը։
-Այս իրավիճակում միակ ելքը քաղաքական փոփոխությունների ճանապարհն է և հակաճգնաժամային նոր կառավարության ձևավորումը՝ նոր վարչապետի գլխավորությամբ։ Այս իշխանությունն արդեն տանուլ է տվել, իրենց սիրած տերմինով ասեմ, հակահամաճարակային պատերազմը։ Մենք ոչ թե տանուլ ենք տալիս, այլ արդեն տվել ենք։ Հիմա պարտության հետևանքներն ենք տեսնում։ Մենք պարտվել ենք դեռ մարտ ամսին, երբ պետք էր արտակարգ դրություն հայտարարվեր։ Սակայն թողեցինք, որ թշնամին մեր սահմանն անցնի, մտնի մեր թիկունք ու ամեն մեկի բնակարան։ Իսկ մնացած խոսակցությունները, թե պատերազմ է, եկեք իշխանությանը չքննադատենք, ընդամենը դեմագոգիա է։ Այս իշխանությունն այդ պատերազմում վաղուց պարտվել է։
Զրույցը՝
Ռուզան ԽԱՉԱՏՐՅԱՆԻ
Հոդվածն ամբողջությամբ՝ «Իրատես» թերթի այսօրվա համարում:
