ԱԺ ԲՀԿ խմբակցության պատգամավոր Նաիրա Զոհրաբյանն այսօր առավոտյան հայտարարել էր, թե իրեն զանգահարել է Կենտրոնի քննչական բաժնի քննիչ ու հայտնել, որ պատրաստվում են ԱԺ իր աշխատասենյակում խուզարկություն կատարել եւ եթե քիչ անց դուռը չբացվի, այն կկոտրեն:
Տիկին Զոհրաբյանը վաղ առավոտ շտապել էր ԱԺ, ավելի ուշ տեղեկացել, որ խոսքը ոչ թե ԱԺ իր աշխատասենյակի, այլ Հանրապետության 47 հասցեում գտնվող ԲՀԿ կենտրոնական գրասենյակում գտնվող իր աշխատասենյակի մասին էր:
Տիկին Զոհրաբյանը ԱԺ-ում լրագրողների հետ զրույցում ասաց, որ չի պատրաստվում գնալ ԲՀԿ կենտրոնական գրասենյակ ու քննիչներին մաղթել է բարի խուզարկություն: Նա նաեւ ասաց, որ իր փաստաբանները կլինեն գրասենյակում ու կհետեւեն խուզարկության գործընթացին:
«Սա քաղաքական հաշվեհարդար է, ինձ լռեցնել հնարավոր չէ, մտածել, որ Նաիրա Զոհրաբյանի վրա կարելի է հարուցել ինչ-ինչ քրեական գործեր, ֆուտուրիստական սյուրռեալիզմ է… Գագիկ Ծառուկյանը դահլիճում նստած է որպես ԱԺ պատգամավոր»,-ասաց տիկին Զոհրաբյանը ու հեռացավ:
Կարդացեք նաև
ԱԺ դիմաց այս պահին ոստիկանական պատ է, ըստ լուրերի, կան նաեւ ջրցան մեքենաներ: Հիշեցնենք, որ այսօր ԱԺ-ում կքննարկվի գլխավոր դատախազի միջնորդությունը ԲՀԿ առաջնորդ Գագիկ Ծառուկյանին անձեռնմխելիությունից զրկելու վերաբերյալ:
Արփինե ՍԻՄՈՆՅԱՆ
