«Իմ քայլը» խմբակցությունը երկուշաբթի նիստ էր գումարել։ Նիստի ավարտից հետո խմբակցության ղեկավար Լիլիթ Մակունցը լրագրողներին հայտնեց, որ քննարկել են քառօրյայի օրակարգը։
«Իհարկե, նաև անդրադարձ է եղել դատախազի միջնորդությանը, որի հետ կապված խմբակցությունը կայացրել է որոշում, բայց մենք մեր դիրքորոշումը կհայտնենք վաղը՝ դատախազի ելույթից հետո՝ փակ գաղտնի քվեարկությամբ»,- ասաց նա։
Նա նշեց նաև, որ դատախազության ներկայացրած միջնորդությունը իրավական հիմք ունի․ «Որևէ կերպ քաղաքական երանգ չպետք է տալ, և պետք է զերծ մնանք իրավական գործընթացներին քաղաքական երանգներ տալուց»։
Հարցին, թե երկու տարի առաջ հուշագիր ստորագրելիս, չգիտեի՞ն, որ ԲՀԿ առաջնորդ Գագիկ Ծառուկյանը ընտրակեղծարար է կամ արտոնագրեր չունեցող խաղատներ չունի, ինչո՞ւ էին հուշագիր ստորագրում, նա պատասխանեց․ «Այն հուշագիրը, որի մասին դուք խոսում եք, ենթադրում եմ՝ նկատի ունեք վարչապետի և Գագիկ Ծառուկյանի հանդիպման մասին։ Այդ հանդիպումը եղել է արտահերթ խորհրդարանական ընտրություններ անցկացնելու համաձայնության մասին, որտեղ Գագիկ Ծառուկյանը հայտնել է իր պատրաստակամությունը նախ՝ ընդհանրապես սատարելու հեղափոխությունը մինչև վերջ, այդ թվում նաև խորհրդարանական ընտրություններով մինչև վերջ հեղափոխությունը հարցնելուն, նաև արտահերթ խորհրդարանական ընտրություններին մասնակցելուն»։
Կարդացեք նաև
Ամի ՉԻՉԱԿՅԱՆ
