Հայաստանը, Հունաստանն ու Կիպրոսը արգելափակել են ՄԱԿ-ի Գլխավոր ասամբլեայի 75-րդ նստաշրջանի նախագահի պաշտոնում Թուրքիայի ներկայացուցիչ, դիվանագետ, քաղաքական գործիչ Վոլքան Բոզքիրի թեկնածությունը: Այս մասին հաղորդում է Greekcitytimes-ը՝ հղում անելով թուրքական T24 կայքին: Greekcitytimes-ը գրում է, որ նման բան նախկինում երբեք չէր եղել և սա պատմական քայլ է:
Ըստ տեղեկության՝ սկզբում վերոնշյալ երեք երկրները դեմ չեն եղել Բոզքիրի առաջադրմանը, որը նաև Թուրքիայի իշխող «Արդարություն և զարգացում» կուսակցության անդամ է, բայց ավելի ուշ որոշել են մերժել այն:
Ավելի վաղ հաղորդել էինք այն մասին, որ Associated Press գործակալությունը՝ հղում անելով իր աղբյուրներին, հայտնել էր, որ ՄԱԿ Գլխավոր ասամբլեայի նախագահի պաշտոնի համար շրջանառվում է Բոզքիրի անունը, բայց մի քանի երկրների ներկայացուցիչներ քվեարկություն են պահանջել: Ըստ գործակալության՝ քվեարկություն են պահանջել Հայաստանի, Հունաստանի և Կիպրոսի դիվանագետները:
Պատրաստեց՝ Վիկտորյա ԱՆԴՐԵԱՍՅԱՆԸ
