Ուսումնասիրությունները ցույց են տվել, որ վարակված քաղաքացիները շատ մոտ հասցեներում են բնակվում, հարեւան շենքերում, նույն մուտքի բնակարաններում, նույն խանութից օգտվող շենքերի հարեւաններ են եւ այլն: Այսօր պարետատան նիստից հետո ասաց առողջապահության նախարար Արսեն Թորոսյանը՝ նշելով, որ այդ երեւույթները համատարած են. «Այսինքն՝ մենք կարող ենք կենտրոնական փողոցներում, Կենտրոնում շատ հանդիպել դիմակներով մարդկանց, սակայն նրանց քիչ հանդիպել բակերում, հարեւանների հետ զրուցելիս, ոչ աշխատանքային ժամերին, որոնք երեկոյան առանց դիմակների են»:
Նախարարի խոսքով, վերլուծաբաններն առաջարկում են այդ ուղղությամբ աշխատել.
«Պատահական չէ, որ ես երկու օր առաջ սկսեցի հրապարակել հասցեներ, ոչ տների, այլ թաղամասերի, որպեսզի մարդիկ իմանան, որ այդ հասցեում եղել է վարակման դեպք, որը կարելի է կանխարգելել դիմակ կրելով եւ սոցիալական հեռավորություն պահպանելով»:
Թորոսյանի խոսքով, ԱՀԿ-ն խորհուրդ է տալիս ռիսկի խմբում եւ 60-ից բարձր քաղաքացիներին հնարավորության դեպքում կրել բժշկական դիմակներ:
Ըստ նախարարի, լավ լուրն այն էր, որ դիմակների գները էական անկում են ապրում եւ շուտով կհավասարվեն մինչ ճգնաժամի գներին: Իսկ, Թորոսյանի խոսքով, վատ լուրն այն է, որ ունենք մահացության միջին տարիքի աստիճանական անկում. «Ինչը նշանակում է, որ մեր ավելի երիտասարդ քաղաքացիներն էլ պետք է անհանգստացած լինեն դիմակների կրումով եւ հենց իրենց համար, ոչ միայն մտածելով, որ կարող են վարակել տան անդամներին, մեծերին, որոնք քրոնիկ հիվանդություններ ունեն: Որովհետեւ մեր բազմաթիվ քաղաքացիներ իրենք էլ չգիտեն իրենց քրոնիկ հիվանդությունների մասին: Չգիտեն, որ իրենք ունեն շաքարային դիաբետ, մեր բազմաթիվ քաղաքացիներ չգիտեն, որ իրենք ունենք բարձր զարկերակային գերճնշում: Եվ այդ երկու ռիսկի գործոնները մահացած գրեթե բոլոր քաղաքացիների մոտ կար: Եվ նաեւ դրա պատճառով է, որ ամենուր, միշտ պետք է կրել դիմակներ՝ բացառությամբ սնվելիս»:
Լուսինե ԲՈՒԴԱՂՅԱՆ
Կարդացեք նաև
