ՀՀ վարչապետ Նիկոլ Փաշինյանն այսօր պարետատան նիստից հետո ասաց, որ եկել է ժամանակը խոստովանելու, որ չեն կարողացել քաղաքացիներին համոզել՝ պահել հակահամաճարակային կանոնները. «Խոսքը դիմակներ կրելու մասին է: Ըստ էության, ի հեճուկս պարետատան կայացրած որոշումների, ի հեճուկս կիրառվող վարչական վարույթների, ի հեճուկս կիրառվող լայնածավալ քարոզչության, կառավարության գործունեության թափանցիկության, Հայաստանի հանրապետությունում մարդիկ զանգվածաբար չեն կրում դիմակներ: Սա Հայաստանի հանրապետությունում կորոնավիրուսի համաճարակի տարածման թիվ մեկ պատճառն է»:
Փաշինյանի խոսքով, «Ֆորբս» ամսագիրը հրապարակել է, Իտալիայի, Իսպանիայի, ԱՄՆ-ի փորձը, որը ցույց է տալիս, որ վիրուսի դեմ պայքարում դիմակները վճռորոշ ազդեցություն ունեն, էականորեն կրճատում են վիրուսի տարածումը:
Ըստ վարչապետի, դիմակները խիստ անհրաժեշտ են նաեւ առողջ մարդկանց, որոնք հնարավորություն են տալիս չշնչել վարակված մարդկանց արտաշնչած մանրէները, որոնք օդում կարող են մնալ տասնյակ րոպեներ. «Սա կարելի է սենսացիա համարել, սա նշանակում է, որ այս տարածքով հիվանդացած քաղաքացին անցավ, կամ հազաց կամ փռշտաց եւ ինքը գնաց, հաջորդ տասը րոպեներին այստեղով անցնող մարդիկ վարակվելու մեծ հավանականություն ունեն»:
Երկրորդ արդյունավետ միջոցը սոցիալական հեռավորության պահպանումն է:
Փաշինյանի խոսքով, այսօր վարակի տարածման նվազում է համարվում այն թիվը, ըստ որի, մեկ մարդը վարակում է մեկից քիչ մարդու. «Մայիսի 25-ից այս կողմ մենք առաջարկել ենք համաճարակի կանխարգելման ամենաարդյունավետ մեթոդները,բայց մեր խնդիրը կայանում է նրանում, որ չենք կարողացել համոզել, պարտադրել մեր քաղաքացիներին, որպեսզի նրանք այդ պայմանները կատարեն: Այսօր էլ մեր տասնյակ հազարավոր քաղաքացիներն այդ պայմանները, ցավոք սրտի, չեն կատարում»:
Կարդացեք նաև
Վարչապետն ասաց, որ վարչական ներգործության ծավալները մեծացնելու են. «Բայց ակնկալում ենք, որ մեր հայրենակիցները կհետեւեն մեր առաջարկած կանոններին»:
Նաեւ ասաց, որ մինչեւ այդ կանոնները չպահենք համաճարակը չենք հաղթահարելու. «Կամ հաղթահարվելու է հետեւյալ կերպ. բոլոր նրանք, որոնք պիտի մահանային՝ կմահանան եւ միայն դրանից հետո միայն թվերը կիջնեն: Սա նշանակում է, որ մեր վարքագծով մեր հարյուրավոր, եթե ոչ հազարավոր մարդկանց դատապարտում ենք մահվան»:
Լուսինե ԲՈՒԴԱՂՅԱՆ
