ԱԺ արտահերթ նիստում այս պահին առաջին ընթերցմամբ քննարկվում է ՀՀ կառավարության հեղինակած՝ «Հարկային օրենսգրքում փոփոխությունների» մասին օրինագիծը, որի թիրախում հարկային դաշտի խնդիրներն են: Ինչպես զեկուցեց ֆինանսների փոխնախարար Արման Պողոսյանը, ներկայումս կան 7650 հարկ վճարողներ, որոնք պարտավոր են կատարել շահութահարկի կանխավճարի պարտավորությունը. «Բայց ընթացիկ տարին աչքի չի ընկնում շահութաբերությամբ: Այս պահանջի կատարումը տնտեսվարող սուբյեկտների համար խնդիրներ է ստեղծում: Առաջարկվողը ժամանակավոր միջոցառում չէ, այլ միտված է ապագային՝ ունենալու համար ավելի նպաստավոր հարկային միջավայր: Օրինագծով սահմանվում է, որ շահութահարկ վճարողները կազատվեն 2020 թ.-ի 2-րդ եռամսյակի համար շահութահարկի կանխավճարներ կատարելու պարտավորությունից, իսկ դրա վերջնաժամկետը հունիսի 20-ն է: Աշխատելու ենք, որպեսզի մինչեւ այդ ժամկետը նախագահն օրենքը ստորագրած լինի»:
Պողոսյանի փոխանցմամբ՝ օրինագծով սահմանվում է նաեւ, որ յուրաքանչյուր եռամսյակի շահութահարկի կանխավճարը կատարվում է նախորդ տարվա արդյունքներով հաշվարկված շահութահարկի գումարի 20%-ի և նախորդ եռամսյակի շրջանառության 2%-ի գումարներից նվազագույնի չափով, նաեւ՝ վերացվում է կանխավճարի որևէ եղանակի ընտրության համար հայտարարություն ներկայացնելու պահանջը. «Սա իմաստազրկված գործիք է»:
Արման Պողոսյանի բնորոշմամբ. «Երբ տնտեսական շոկի նմանվող իրավիճակի հետ գործ ունենք, ընթացիկ օրենսդրական կարգավորումները համահունչ չեն իրականությանը»:
«Իմ քայլի» պատգամավոր Վիկտոր Ենգիբարյանն արձանագրեց, որ այս օրենսդրական փոփոխությունը բխում է կորոնավիրուսի տարածմամբ պայմանավորված իրավիճակից:
Կարդացեք նաև
Փոխնախարարը նկատեց՝ թեեւ սա կորոնավիրուսի տնտեսական ճգնաժամի շրջանակում է արվում, սակայն դրա անհրաժեշտությունն արդեն հասունացել էր, եւ կորոնավիրուսը միայն արագացրեց խնդրի հաղթահարումը. «Հեռահար նպատակն է՝ ունենալ ավելի լավ եւ նպաստավոր գործարար միջավայր»:
Հավելենք, որ օրինագիծն առաջիկայում դրվելու է երկրորդ եւ ամբողջական ընթերցման:
Լուիզա ՍՈՒՔԻԱՍՅԱՆ
