Վերաքննիչ քրեական դատարանում դատավոր Արսեն Նիկողոսյանի նախագահությամբ ՀՀ 2-րդ նախագահ Ռոբերտ Քոչարյանի խափանման միջոցի վերաբերյալ Երեւան քաղաքի ընդհանուր իրավասության դատարանի՝ խափանման միջոց կալանավորումը վերացնելու մասին որոշման դեմ բողոքի դռնբաց նիստն սկսվելուց առաջ Ռոբերտ Քոչարյանի պաշտպան Հովհաննես Խուդոյանը դատարանին խնդրեց, որ դահլիճում ապահովվի ոչ միայն օպերատորների, որոնք ապահովում են ուղիղ կապը, այլեւ գրավոր նյութը կազմող լրագրողների ներկայությունը, որոնք միջանցքում սպասում են:
Ի պատասխան, դատավոր Արսեն Նիկողոսյանը նկատեց, որ դատական նիստերի դահլիճն առանց այդ էլ փոքր է, դահլիճում դատավարության ոչ մասնակից մեծ քանակությամբ մարդիկ կան եւ ինքը կարգադրիչներին առաջարկում էր, որ դահլիճում միայն օպերատորների ներկա գտնվելն ապահովեն, որպեսզի նրանք տեսանկարահանեն եւ ձայնագրեն ամբողջ նիստի ընթացքը: Դատավորի խոսքով, հակառակ դեպքում դահլիճում սոցիալական պահանջվող հեռավորություն պահպանելը դժվար լինի, ինչը կվտանգի ինչպես նիստի մասնակիցների, այնպես էլ իրենց՝ լրագրողների առողջությունը:
Հայտարարվեց մեկ րոպե ընդմիջում, որ լրագրողներին տեղյակ պահեն դատարանի պահանջներին, թույլատրեն նկարահանող եւ ձայնագրող սարքերը տեղադրել դահլիճում եւ հետո վերցնել, ինչից հետո դատական նիստը սկսվեց:
Աշոտ ՀԱԿՈԲՅԱՆ
