Հայաստանի դեմոկրատական կուսակցության հայտարարությունը
Մենք չենք պաշտպանել նախորդ երեք ռեժիմների վերջնակետում ձախողված քաղաքականությունը:
Մենք պայքարել ենք անարդարությունների դեմ, հանուն համակարգային փոփոխությունների:
Մենք ջատագովն ենք քաղաքացիական համերաշխության մթնոլորտում օրենքի գերակայությամբ արդարության ամբողջական հաստատմանը:
Կարդացեք նաև
Մենք հույսեր էինք տածում, որ ժողովրդի կողմից մերժված նախորդ իշխանությունների բարքերն այլևս տեղ չունեն մեր իրողության մեջ:
Այսօր փաստում ենք՝ օրվա իշխանությունները, հանրությունը բաժանելով «սև» ու «սպիտակների», ատելության, անհանդուրժողականության մթնոլորտ ձևավորեցին երկրում, արդարացնելով այն «կոռուպցիայի դեմ պայքարի» պատրվակով:
Իրականում, հռչակած սկզբունքը կիրառվում է ընտրովի, տվյալ դեպքում՝ Բարգավաճ Հայաստան կուսակցության ընդդիմադիր ձայնը լռեցնելու նպատակով, իսկ երևույթի հիմքը հանդիսացող ՀՀՇ հանցավոր կառավարման տարիներն իրավական գնահատականի չեն արժանանում:
Սեփական սխալների, կառավարչական անկարողության պատճառով տապալելով համավարակի դեմ պայքարը, երկրի գործադիր իշխանությունը արտակարգ դրությունը երկարաձգելով, փորձում է լռեցնել զանգվածային դժգոհությունն իրենց ներքին տնտեսական անպտուղ, ազգային անվտանգության, Արցախի հիմնահարցի կարգավորմանն ուղղված քայլերի նկատմամբ:
ՀԴԿ-ն անընդունելի և դատապարտելի է համարում քաղաքական երանգավորումով քրեական հետապնդումները:
Այսօր, համավարակի չթուլացող գրոհի, տնտեսության իրական զարգացման ծրագրերի բացակայության, սոցիալական հնարավոր լարվածության, արտաքին թշնամիների բռնազավթողական նկրտումների, Արցախի հիմնահարցի կարգավորման անբարենպաստ ընթացքի պարագայում, մեր ազգին անհրաժեշտ է ուժերի համախմբում՝ մարտահրավերները հաղթահարելու համար:
Եթե գործող իշխանությունները շարունակեն վարել իրենց սեփական շահերը հետապնդող քաղաքականություն, ապա կարժանանան նախկին իշխանությունների ճակատագրին:
Հայաստանի դեմոկրատական կուսակցության նախագահություն
15.06.2020թ.
