«Լուսավոր Հայաստան» խմբակցության պատգամավոր Անի Սամսոնյանն այսօր ԱԺ-ում ԲՀԿ առաջնորդ Գագիկ Ծառուկյանի շուրջ իրադարձություների հետ կապված ասաց. «Կան իրավական գործընթացներ ու դրանց նկատմամբ կա քաղաքական միջամտություն եւ ազդեցություն եւ դա փաստում է իր գործողություններով իշխանությունը: Ընդդիմադիրները սրում են իրենց հռետորաբանությունը՝ իշխանությունները իրավական գործընթացներ են սկսում»:
Անի Սամսոնյանն ասաց, որ պաշտոնյաների բարձր մակարդակով տարածվում են նախաքննական գաղտնիքի փաստաթղթեր, որոշում են՝ մեղավոր է, թե՞ անմեղ է այդ անձը ու դատավճիռ են իրականացնում սոցցանցերում. «Այո, բոլոր նրանք, ովքեր հանցագործություններ են կատարել պետության նկատմամբ, պիտի պատասխանատվություն կրեն: Բայց այն, ինչ կատարվում է այսօր, մենք տեսնում ենք, որ լինում է քաղաքական նպատակահարմարության ներքո»:
Հարցին՝ եթե գլխավոր դատախազը Ծառուկյանին անձեռնմխելիությունից զրկելու հարցով գա ԱԺ, ձեր խմբակցությունն ունի՞ որոշում, թե ինչպես է քվեարկելու՝ Սամսոնյանը պատասխանեց, որ դեռ Արթուր Դավթյանն այդ հարցով չի եկել ԱԺ ու իրենք չեն քննարկել խմբակցությունում:
Ինչ վերաբերում է ոստիկանության գործողություններին, Անի Սամսոնյանն ասաց. «Եթե իշխանությունները պնդում են, որ այսօր այն եղանակներն ու մեթոդները, որն օգտագործում է ոստիկանությունը, իրավաչափ են, նշանակում է նախկինների ոստիկանությունը՝ Սերժ Սարգսյանի ոստիկանությունը ճիշտ էր աշխատում: Իրականում մենք տեսնում ենք, որ ոստիկանությունը անհամաչափ ուժ է կիրառում…Դուք կադրերը տեսե՞լ եք, թե ինչպես էին քարշ տալիս կին քաղաքական գործիչներին, պատգամավորներին»:
Կարդացեք նաև
Սամսոնյանը հիշեցրեց, որ իրենք ասում էին՝ գործարարը չպետք է զբաղվի քաղաքականությամբ, բայց իշխանությունները քաղաքական հուշագիր կնքեցին Ծառուկյանի հետ ու դարձրին իրենց գործընկերը ու հիմա, երբ այդ գործընկերը սրել է իր հռետորաբանությունը, նման քայլերի են դիմում:
Հռիփսիմե ՋԵԲԵՋՅԱՆ
