«2017-ի ընտրությունների ժամանակ հիշում եմ մի ռեպորտաժ, որտեղ երևում էր թե′ Գագիկի Ծառուկյանի, թե′ ԲՀԿ-ի՝ այն ժամանակ «Ծառուկյան» դաշինքի կողմից ակնհայտ ընտրակաշառքի նմանվող գործողությունների իրականացումը»,-հարցին՝ լինելով դիտորդական կազմակերպության ղեկավար, ի՞նչ կարծիք ունի՝ ինչպիսի՞ն էր ԲՀԿ վարքագիծը վերջին տարիների ընտրություններին, կայի՞ն կասկածելի դրվագներ, կարո՞ղ է իրավաչափ լինել թեկուզ այդպիսի կասկած Գագիկ Ծառուկյանի դեմ կատարվող գործողությունները, ՀՀ ԱԱԾ-ի դիմաց լրագրողների հետ զրույցում այս առիթով այսպիսի կարծիք հայտնեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:
Հիշեցնենք՝ հունիսի 14-ին՝ վաղ առավոտից, ԱԱԾ-ն ԲՀԿ առաջնորդ Գագիկ Ծառուկյանի առանձնատանը խուզարկություն էր իրականացնում, որն առնչվում է 2017 թ.-ին մեծամասնական ընտրակարգով ԲՀԿ-ից առաջադրված թեկնածու Վազգեն Պողոսյանի հետ կապված քրեական գործին: Այնուհետև Գագիկ Ծառուկյանը ժամեր շարունակ հարցաքննվում էր ԱԱԾ-ում, իսկ ԲՀԿ-ական պատգամավորներ ու իրավապաշտպաններ ԱԱԾ շենքի հարակից տարածքում բողոքի ցույց էին անում:
Դանիել Իոաննիսյանն ասաց, որ 2017-ին թե′ խոստումների, թե′ բարեգործության, թե′ քարոզչության համատեղման առումով, ինչը դեռ քրեորեն հետապնդելի չէր, բոլորին ակնհայտ է, որ ընտրակաշառքին համարժեք գործողություններ էին կատարվել, և շատ դրվագներ ուղղակի տեսախցիկի առաջ էին արվում, նույնիսկ ԿԸՀ-ն արձանագրեց, որ ընտրախախտում է:
Հարցին՝ կատարվածն արդյոք կապված չէ՞ Գագիկ Ծառուկյանի վերջին հայտարարությունների հետ, Դանիել Իոաննիսյանը պատասխանեց. «ՀՀ-ում մի հետաքրքիր երևույթ կա: Երբ անձինք իմանում են, որ կոպիտ ասած իրենց հետևից գալու են, քրեական գործեր կարող են հարուցվել, ակտիվ ընդդիմադիր կեցվածք են դրսևորում: Չեմ կարող հարյուր տոկոսով պնդել, որ այս անգամ նման իրավիճակի հետ գործ ունենք, բայց կա նաև դրա շոշափելի հավանականությունը»:
Կարդացեք նաև
Հարցին՝ չե՞ք բացառում, որ Գագիկ Ծառուկյանը ընտրակաշառք բաժանած լինի, Դանիել Իոաննիսյանը պատասխանեց. «Ես ոչ միայն չեմ բացառում, այլ ինձ համար որոշակի առումով զարմանալի էր, որ առ այսօր չէր բացահայտվում: Լատենտային հանցագործությունները դժվար է բացահայտել, առավել ևս տարիներ անց, առավել ևս ինձ համար զարմանալի չէր: Մենք «Անկախ դիտորդ» կազմակերպությամբ դիտարկում էինք 2017-ի ընտրությունները, և այդ առումով, մթնոլորտի առումով, զարմանալի չէր: Ես ուրախ եմ, որ այդ ամենն ի վերջո բացահայտվում է: Հուսով եմ, որ ՀՀ-ում ընտրական հանցագործություններ գործած անձինք ուշ թե շուտ կկանգնեն դատարանի առաջ»:
Հիշեցմանը՝ ԲՀԿ-ից հայտարարում են, որ սարքած գործեր են, Դանիել Իոաննիսյանն արձագանքեց, «Լավ ծանոթ չլինելով քրեական գործի նյութերին՝ ամեն դեպքում, այդ գործերով բարձրացված հարցերի և ընդհանուր պատկերի և ՀՀ-ում տարիներ շարունակ տիրած մթնոլորտի համամասնությունը բերում է այն եզրահանգման, որ բավականին խելքին մոտ բաներ են, հնարավոր է՝ տեղի է ունեցել»:
Հարցին՝ հնարավո՞ր է ներկա իշխանությունները դիմեն քաղաքական հետապնդման, նրանցից նման բան սպասո՞ւմ է, Դանիել Իոաննիսյանը պատասխանեց. «Չեմ կարծում, որ ներկա իշխանություններն իրականացնեն քաղաքական հետապնդում, նրանք առնվազն այդքան էլ մոտիվացիա չունեն: Ամեն դեպքում ներկայիս իշխանությունների հեղինակությունը այնքան բարձր է, որ նրանք կարծում եմ՝ կարիք չունեն դա անելու: Ամեն դեպքում, ՀՀ-ում այնպիսի իրավիճակ չէ, երբ կարելի է ուղղակի անտեղի մարդուն քրեական հետապնդման ենթարկել: Դա ներկայիս Հայաստանում այդքան էլ իրատեսական չէ»:
Խոսելով ոստիկանական գործողությունների մասին՝ նա ասաց, որ դրանք իրավաչափ էին ու պարզաբանեց. «Սա հավաք էր, իսկ Հայաստանում բոլոր տեսակի հավաքները արգելված են, ինչն ունի տրամաբանություն: Կարող է Հանրային խորհրդով կառավարությանն առաջարկենք, որ մինչև հինգ հոգանոց հավաքները, որոնց ժամանակ պահվում է հեռավորություն, թույլատրվեն: Իսկ այսպիսի հավաքները միարժեք է, որ արգելված են և պետք է արգելված լինեն: Այս իմաստով ոստիկանության գործողությունները, դադարեցման գործողությունները իրավաչափ էին»:
Տաթև ՀԱՐՈՒԹՅՈՒՆՅԱՆ
մարդիկ Հայաստանում մահանում են ճանճերի պես, բայց Փաշինյանը խոսում է Զարուկյանի մասին: Որտեղ են ձեր առաջնահերթությունները: