20:30-ԱԱԾ շենքի հարակից տարածքից ոստիկաններն առանց ուժի գործադրման բերման ենթարկեցին եւս 5 քաղաքացու: Օրվա ընթացքում բերման ենթարկվածների թիվն արդեն անցնում է 100-ից:
20:35-Նալբանդյան-Խանջյան փողոցում «դիտորդի» դերում գտնվող քաղաքացիներին ոստիկանները բացատրական աշխատանքով հորդորում են հեռանալ:
20:40-Առանց ուժի գործադրման բերման ենթարկվեց եւս 3 քաղաքացի: 1 երիտասարդ էլ չէր ցանկանում նստել ոստիկանական մեքենան, եւ ոստիկանները նրան ուժով նստեցրին: «Ես ձեր ցավը տնեմ, տղեք ջան, թողեք, գալիս եմ»,-ոստիկաններին ասաց եւս մեկ բերման ենթարկվող տղամարդ:
Հիշեցնենք՝ առավոտից ԱԱԾ-ն խուզարկում է ԲՀԿ առաջնորդ Գագիկ Ծառուկյանի առանձնատունը, ԲՀԿ ղեկավարության առնչությամբ 2017թ.-ին ենթադրյալ ընտրակաշառքի եւ «Շանգրի Լա» խաղատան հետ կապված պետությանը վնասի ենթադրյալ պատճառման առնչությամբ ԱԱԾ-ն այսօր հաղորդագրություններ տարածեց: Ծառուկյանն ԱԱԾ-ում հարցաքննվում է:
Կարդացեք նաև
20:45-«Եթե նկատել եք, մենք քաղաքացիներին հեռանալու ողջամիտ ժամանակ ենք տալիս, բայց քաղաքացիները նորից հետ են գալիս: Ոստիկանության նպատակը քաղաքացիներին բերման ենթարկելը չէ: Քաղաքացիներ կան, որ հորդորը չեն լսում, մնում են եւ չգիտես ինչու՝ դժգոհում ոստիկանների գործողություններից»,-լրագրողներին ասաց ոստիկանության բարձրաստիճան պաշտոնյաներից մեկը: Ոստիկանությունը բարձրախոսով հայտարարում է, որ արտակարգ դրության ժամանակ հավաքներն արգելված են:
Լուիզա ՍՈՒՔԻԱՍՅԱՆ
