«Ակնհայտ է, որ այն մեթոդը, որը ընտրել է իշխանությունը, տանում է առճակատման, և ամբողջ պատասխանատվությունը իշխանության վրա է»,- ԱԱԾ հարակից տարածքում լրագրողների հետ զրույցում ասաց Հայ հեղափոխական դաշնակցության Գերագույն մարմնի անդամ Արծվիկ Մինասյանը։
Նրա կարծիքով՝ իշխանության ընտրած ճանապարհը, այն է՝ ընդդիմախոսությանը նման կերպ պատասխանելը, բերելու է շատ ավելի ծանր և դժվար հետևանքների․ «Ուստի՝ ժամ առաջ, վայրկյան առաջ իշխանությունը պետք է գիտակցի այս ամենը։ Իրավապահ մարմիններին չպետք է օգտագործի այս գործընթացում։ Առավել ևս, երբ Սահմանադրության համաձայն՝ Ազգային ժողովի պատգամավորի նկատմամբ չի կարելի քրեական հետապնդում իրականացնել, ազատությունից զրկելու որևէ գործողություն իրականացնել՝ առանց Ազգային ժողովի համաձայնության։ Խախտված է ամեն ինչ՝ Սահմանադրությունից սկսած, բարոյական նորմերով ավարտված։ Հետևաբար՝ դատապարտելի է այս ամբողջ երևույթը»։
Արծվիկ Մինասյանը կարծում է, որ երկիրը պահանջում է արտակարգ գործողություններ, և դրա ներքո քաղաքական իշխանությանը պատասխանատվության կանչելու քայլեր․ «Այնպես որ սա քաղաքական օրակարգն է մեր նաև։ Եվ սա ոչ թե մեկ անձի կամ անհատի խնդիր է, այլ մի ողջ պետության, քաղաքական համակարգի։ Այնպես որ ժողովրդի պահանջը ճիշտ է»։
Կարդացեք նաև
Ամի ՉԻՉԱԿՅԱՆ
