«Արդեն տեղեկություն ենք ստացել, որ Գագիկ Ծառուկյանին հարցաքննության են հրավիրել վկայի կարգավիճակով, բայց պատրաստվում են նրան ձերբակալել եւ նրա պատգամավորական անձեռնմխելիության հարցն առաջ քաշել»,-լրագրողներին քիչ առաջ ԱԱԾ-ի դիմաց, որտեղ ցուցարարների եւ ոստիկանների միջեւ լարված իրավիճակ է, ասաց ԲՀԿ պատգամավոր Շաքե Իսայանը:
Հիշեցնենք, որ վաղ առավոտից ԱԱԾ-ն ԲՀԿ առաջնորդ Գագիկ Ծառուկյանի առանձնատանը խուզարկություն է անում, որն առնչվում է 2017 թ.-ին մեծամասնական ընտրակարգով ԲՀԿ-ից առաջադրված թեկնածու Վազգեն Պողոսյանի հետ կապված քրեական գործին:
«Մեր ներքին աղբյուրներն են մեզ հայտնել այդ մասին»,-նշեց Իսայանը:
Կարդացեք նաև
Ոստիկանների եւ ցուցարարների միջեւ քաշքշուքից հետո էլ, երբ որոշ կուսակցականներ բերման ենթարկվեցին, ԲՀԿ-ական պատգամավոր Նաիրա Զոհրաբյանը հայտարարեց. «Գործադրվեց բռնություն պատգամավորի հանդեպ: Սա բեսպրեդել է: Եթե կարծում են, որ մեզ վախեցնելով եւ ձերբակալելով կարող են լռեցնել, սխալվում են: Մենք բոլորս Գագիկ Ծառուկյան ենք»:
Հիշեցնենք, որ ԱԱԾ-ն Գագիկ Ծառուկյանի առնչությամբ երկու հաղորդագրություն տարածեց այսօր:
«Դրանք իրավական ֆուտուրիզմ են: Իմ տանն այս պահին խուզարկություն չի եղել, բայց պատրաստ եմ, որ ինձ էլ կարող են ձերբակալել, եւ սա այս իշխանության վերջի սկիզբն է»,-ասաց Նաիրա Զոհրաբյանը:
Ծառուկյանի խոսնակ Իվետա Տոնոյանն էլ հաստատեց, որ Ծառուկյանի կարգավիճակն այս պահին վկայի է. «Նա բերման չի ենթարկվել, նա եկել է հարցաքննության»:
«Նման բան չկա, դա սուտ է, հեսա հետաքննությունը կպարզի: Սա առիթ է, որ պարոն Ծառուկյանին բերեին ԱԱԾ»,-ԱԱԾ հաղորդագրությունների վերաբերյալ լրագրողներին իր հերթին նման կարծիք հայտնեց ԲՀԿ պատգամավոր Կարինե Պողոսյանը:
ԲՀԿ ղեկավարության կողմից ընտրակաշառքի ենթադրյալ բաժանման հետ կապված էլ ԲՀԿ պատգամավոր Էդուարդ Բաբայանն ասաց, որ նման բան չկա:
«Եթե տվյալներ ունեին, թող մինչեւ Գագիկ Ծառուկյանի հայտարարությունը ներկայացնեին: Ստում են, ստի կառավարություն է»,-իր հերթին ասաց ԲՀԿ-ական Արման Աբովյանը: Նա նաեւ սուտ որակեց տեղեկություններն այն մասին, որ Գագիկ Ծառուկյանն իմացել է այս քրեական գործերի մասին եւ նախապես՝ հունիսի հինգին կատարել է իշխանությանը քննադատող հայտարարություն:
Լուիզա ՍՈՒՔԻԱՍՅԱՆ
