«Բարգավաճ Հայաստան» կուսակցության անդամներն ու այլ քաղաքացիներ, որոնք տեսել են Գագիկ Ծառուկյանի առանձնատուն տանող ճանապարհին կուտակված մեքենաները, այս պահին տեղում հավաքված են: Հիշեցնենք, որ վաղ առավոտից ԲՀԿ առաջնորդ Գագիկ Ծառուկյանի առանձնատանն ԱԱԾ-ն խուզարկություն է անում, որն առնչվում է 2017 թ.-ին մեծամասնական ընտրակարգով ԲՀԿ-ից առաջադրված թեկնածու Վազգեն Պողոսյանի հետ կապված քրեական գործին: Հավաքվածները շարժվեցին դեպի Ծառուկյանի առանձնատան դարպասների մոտ, որտեղ վանկարկում են՝ «Ծառուկյա՜ն-Ծառուկյա՜ն»:
«Վարչապետ Նիկոլ Փաշինյանն ու առողջապահության նախարարը տապալել են կորոնավիրուսի դեմ պայքարը ու հիմա չգիտեն, թե իրենց ձախողումը ոնց փակեն, նման շոու են անում: Սա քաղաքական ուժին եւ այդ ուժին աջակցողներին լռեցնելու փորձ է»,-լրագրողների հետ զրույցում ասաց ԲՀԿ երիտասարդական միության ղեկավար Աշոտ Անդրեասյանը:
Մի կին էլ դժգոհեց. «Երբ 2018թ.-ին ճանապարհ էի փակում, ինչի՞, ո՞ւմ համար էի անում, Նիկոլի համա՞ր: Այո, համամիտ եմ, թող Նիկոլը լինի, բայց ոչ թե այսպես ագրեսիվ մոտենա… Իրեն ձայն տվողի դուռն այսպես չեն փակում: Սենց բաներ մի արա, ապրի ճշտով ու մաքուրով: Դիմակներով մարդկանց բերանը մի փակի»: Կինը հավելեց. «Ճանապարհ էինք փակում, որ Սերժը հեռանա, բայց այնպես հեռացավ, կարծես հարսանիքի քավոր լիներ»:
Կարդացեք նաև
Լուիզա ՍՈՒՔԻԱՍՅԱՆ
