«Գագիկ Ծառուկյանն օրերս իր ելույթում ընդամենը մտահոգություններ էր հայտնել երկրի առջեւ ծառացած խնդիրների մասին: Եթե քաղաքական ուժին քաղաքական կարծիք հայտնելու համար նման ոստիկանական ռեպրեսիաների են անցնում… բոլոր միջազգային կառույցները եւ դեսպանատները տեղեկացված են: Ակնկալում ենք, որ միջազգային իրավապաշտպան կազմակերպություններն իրավական գնահատական տան»,-«Բարգավաճ Հայաստանի» պատգամավոր Արման Աբովյանի «ֆեյսբուքյան» էջում ուղիղ միացմամբ այսօր ասաց «Բարգավաճ Հայաստանի» պատգամավոր Նաիրա Զոհրաբյանը՝ անդրադառնալով այսօր վաղ առավոտից ԲՀԿ առաջնորդ Գագիկ Ծառուկյանի առանձնատանն իրականացվող խուզարկությանը, որն առնչվում է 2017 թ.-ին մեծամասնական ընտրակարգով ԲՀԿ-ից առաջադրված թեկնածու Վազգեն Պողոսյանի հետ կապված քրեական գործին:
ԲՀԿ պատգամավոր Գեւորգ Պետրոսյանն էլ համոզմունք հայտնեց, որ քաղաքական կարծիք հայտնելու համար նման հետապնդումների ենթարկելը խոսում է բռնապետության մասին. «Սա բացահայտ քաղաքական հետապնդում է: Երբ Նիկոլ Փաշինյանը պնդում էր, թե ՀՀ-ում քաղբանտարկյալներ չկան, թող իմանա՝ իրական քաղբանտարկյալները կլինեն նրանք, ում այսօր կձերբակալեն»: Զոհրաբյանը հավելեց. «Մեր շատ համախոհների տներում եւ բանկարաններում գտնվում են ԱԱԾ-ականներ: Ուզում ենք հանրությունն իմանա, որ այս իշխանությունը չի հանդուրժում այլակարծություն: Գիտե՞ք՝ ԱԱԾ-ի որքան աշխատակից կա այստեղ»:
Կարդացեք նաև
Լուիզա ՍՈՒՔԻԱՍՅԱՆ
