«Սա ակնհայտ քաղաքական հետապնդում է եւ 2015թ.-ի դեժավյուն կարծես լինի, որովհետեւ այս գործողությունները ցույց են տալիս՝ իշխանութունը ունակ չէ ընկալելու քննադատությունն ու իրողությունը, ընդունելու իրենց սխալները»,-լրագրողների հետ զրույցում քիչ առաջ ասաց «Բարգավաճ Հայաստան» խմբակցության պատգամավոր Արման Աբովյանը՝ անդրադառնալով այսօր վաղ առավոտից ԲՀԿ առաջնորդ Գագիկ Ծառուկյանի առանձնատանն իրականացվող խուզարկությանը, որն առնչվում է 2017 թ.-ին մեծամասնական ընտրակարգով ԲՀԿ-ից առաջադրված թեկնածու Վազգեն Պողոսյանի հետ կապված քրեական գործին:
«Այս պահին բուն պատճառը չէի մանրամասնի, բայց քաղաքական ենթատեքստ կա, դա ակնհայտ է: Խուզարկություններ են տեղի ունենում նաեւ կուսակցական գրասենյակներում՝ Գեղարքունիքում: Փորձում են լայնածավալ ճնշում գործադրել, լռեցնել. չենք լռելու: Սա իշխանության հերթական՝ տրամաբանությունից դուրս քայլն է, որը հաստատ կունենա իր քաղաքական հետեւանքը»,-համոզմունք հայտնեց պատգամավորը: Նա նաեւ հայտնեց, որ Գագիկ Ծառուկյանն այս պահին իր տանն է:
Լուիզա ՍՈՒՔԻԱՍՅԱՆ
