Այս հանգստյան օրերին ադրբեջանցիներին կրկին արգելել են դուրս գալ տանից, նրանք չեն կարող գնալ նույնիսկ դեղատուն կամ մթերային խանութ: Ինչպես հաղորդում է BBC-ի ռուսական ծառայությունը, նման խիստ միջոցներ սահմանվել էին նաև նախորդ շաբաթ՝ ի պատասխան կորոնավիրուսի հաստատված դեպքերի թվի ավելացման, ինչը հանգեցրել էր դժգոհության ալիքի բարձրացման և ոստիկանության կողմից ուժի կիրառման:
Նշվում է, որ մայիսի 18-ից Ադրբեջանում քաղաքացիները կարող էին այցելել ռեստորաններ, գեղեցկության սրահներ: Բայց նախորդ շաբաթ մարդկանց անսպասելի հայտնել են, որ հունիսի 6-ին և 7-ին արգելված է տանից դուրս գալ: Իշխանություններն այս որոշումը մեկնաբանել են նրանով, որ 1 օրում գրանցվել է կորոնավիրուսի 300 նոր դեպք, իսկ նախքան սահմանափակումների մեղմացումը, որպես կանոն, օրական դեպքերի թիվը չի գերազանցել 50-ը: Պաշտոնական տվյալներով՝ Ադրբեջանում կորոնավիրուսի հաստատված դեպքերի թիվը շուրջ 9000 է, հիվանդության հետևանքով մահացել է ավելի քան 100 մարդ:
BBC-ի փոխանցմամբ՝ նախորդ շաբաթ Բաքվի բնակելի թաղամասերից մեկում աղբը նետել են ոստիկանության մեքենայի վրա այն բանից հետո, երբ ոստիկաններն արգելել են այն դուրս տանել: Միջադեպից հետո տասնյակ ոստիկաններ են ժամանել այդ թաղամաս, ներխուժել են տարբեր բնակարաններ, ծեծել են մարդկանց և բռնի ուժով նրանց դուրս են հանել տներից: ՆԳՆ-ի տվյալներով՝ ձերբակալվել է 11 մարդ: Ձերբակալվածներից մեկը, որին ավելի ուշ բաց են թողել հարցազրույց է տվել «Ամերիկայի ձայն»-ին և ասել, որ ոստիկանության տեղամասում այսքան են հարված իր գլխին, որ կորցրել է գիտակցությունը:
Նման խիստ կարանտին սահմանելու որոշումը քննադատել են Ադրբեջանի մի քանի բժիշկներ, նրանք դիմում են գրել երկրի նախագահ Իլհամ Ալիևի անունով և խնդրել միջամտել ստեղծված իրավիճակին: Նրանք նշել են, որ սահմանափակումների պատճառով շտապ-օգնության մեքենաները չեն կարողացել ժամանակին տեղ հասնել, ինչի հետևանքով գրանցվել են մի շարք մահեր:
Կարդացեք նաև
Գործակալությունը միևնույն ժամանակ նշում է, որ ադրբեջանցիներն իրենց բողոքի ձայնը բարձրացրել են հիմնականում Ֆեյսբուք սոցիալական ցանցում, և միայն ակտիվիստ Գիաս Իբրահիմովն է հունիսի 9-ին բարձրացել բնակելի շենքերից մեկի տանիքը և բարձրախոսով քննադատել ոստիկանության գործողությունները: Նույն օրը նա տուգանվել է 50 մանաթով:
Պատրաստեց` Վիկտորյա ԱՆԴՐԵԱՍՅԱՆԸ
