Ուկրաինայի նախագահ Վլադիմիր Զելենսկու կինը վարակվել է կորոնավիրուսով։ Այս մասին ասվում է նախագահի գրասենյակի հաղորդագրության մեջ, որը հրապարակվել է ֆեյսբուքյան էջում: Տեղեկության համաձայն՝ Ուկրաինայի առաջին տիկինն իրեն լավ է զգում, որևէ ախտանիշ չունի:
Նա մեկուսացել է ընտանիքի անդամներից և ամբուլատոր բուժում է ստանում: Հայտնի չէ, թե Ելենա Զելենսկայան որտեղ կամ ումից է վարակվել։ Նշվում է, որ Զելենսկու ընտանիքի անդամները պահպանել են հիգիենայի բոլոր կանոնները, ինչպես նաև սոցիալական հեռավորություն:
Վլադիմիր Զելենսկու և նրա երկու երեխաների կորոնավիրուսի թեստի պատասխանը բացասական է։ Չնայած դրան՝ Ուկրաինայի նախագահը հայտարարել է, որ անցնում է աշխատանքային հատուկ ռեժիմի, սահմանափակում է շփումները և խորհրդակցություններ է անցկացնելու առցանց ռեժիմով։
Պատրաստեց` Վիկտորյա ԱՆԴՐԵԱՍՅԱՆԸ
Կարդացեք նաև
