Հրանտ Դինքի կնոջ՝ Ռաքել Դինքին և Հրանտ Դինքի անվան հիմնադրամի իրավաբանին ուղարկված սպանության սպառնալիքով նամակների գործով Ստամբուլի հանրապետական գլխավոր դատախազությունը պաշտոնապես հետաքննություն էր սկսել։
Դատախազության կողմից իրականացված քննության արդյունքում 18 էջից բաղկացած մեղադրական եզրակացություն է կազմվել։ Եզրակացության մեջ նշված է 9 հայցվորի անուն, այդ թվում՝ Հրանտ Դինք հիմնադրամի ղեկավարների և հիմնադրամի փաստաբան Ֆեթհիյե Չեթինի անունը։
Ըստ այդ եզրակացության՝ Հյուսեին Աթեշին, որը մինչ այդ Քոնյայում ձերբակալվելուց հետո տեղափոխվել էր Ստամբուլ, այնուհետև՝ կալանավորվել, Դինքի հիմնադրամի ինստագրամյան էջին 3 առանձին սպառնալից մեկնաբանություն էր կատարել։ Աթեշի նկատմամբ պահանջվում է 7․5 – 26 տարի 3 ամիս ազատազրկում։ Նա մեղադրվում է «շղթայաբար չստորագրված նամակի կամ հատուկ նշանների միջոցով սպառնալիք հնչեցնելու» հոդվածի հատկանիշներով։
Մյուս կասկածյալը՝ էրսին Բաշքանը, որը մայիսի 30-ին հիմնադրամի էլեկտրոնային հասցեին սպառնալից նամակ էր ուղարկել, մեղադրվում է վերոհիշյալ հոդվածի հատկանիշներով։ Նրա նկատմամբ պահանջվել է 2․5- 8 տարի 9 ամիս ազատազրկում։
Կարդացեք նաև
Աղբյուրի հաղորդմամբ՝ եթե ընդունվի այս մեղադրական եզրակացությունը, ապա Աթեշին և Բաշքանին կդատեն Ստամբուլի առաջին ատյանի դատարանում։
Հիշեցնենք, որ Ստամբուլում գործող Հրանտ Դինքի հիմնադրամը հայտարարություն էր տարածել, ըստ որի՝ անհայտ անձը կամ անձինք մայիսի 27-28-ին հիմնադրամի էլեկտրոնային հասցեին սպառնալից նամակ են ուղարկել, որում տեղ են գտել պնդումներ, թե Հրանտ Դինք հիմնադրամը «եղբայրության հեքիաթներ» է պատմում։ Նամակի հեղինակները սպառնացել էին սպանել Հրանտ Դինքի այրուն՝ Ռաքել Դինքին և հիմնադրամի իրավաբանին։
Մայիսի 30-ի գիշերը հիմնադրամի էլեկտրոնային հասցեին ևս մեկ սպառնալից նամակ էր ուղարկվել։
Աղբյուր` Ermenihaber.am/dha.com.tr
