Մեդիա կենտրոնի կազմակերպած «Փչացած հեռախոսի էֆեկտ. կառավարություն- քաղաքացիներ հաղորդակցման խնդիրներ» թեմայով առցանց քննարկման ընթացքում շեշտվեց, որ արտակարգ դրության իրավիճակներում հատկապես կառավարության ուղերձները քաղաքացիներին պետք է լինեն չափազանց հասկանալի, այնքան հասկանալի, որ դրանք մեկնաբանելու, պարզաբանելու անհրաժեշտություն քաղաքացիները չունենան, քանի որ արտակարգ իրավիճակում կառավարությունից եկած ուղերձը, կոչը, հրահանգը ենթակա է անհապաղ կատարման: Կորոնավիրուսի տարածման արագությունը կառավարության ուղերձների հանդեպ քաղաքացիների արձագանքը վկայում է, որ այդ ուղերձներն արդյունավետ չեն աշխատել, որ կառավարություն-քաղաքացի հաղորդակցությունը խնդիր ունի:
Այս հարցադրման առիթով, մշակութային մարդաբան Գայանե Շագոյանն ասաց. «Այս պահին դեղամիջոցներ տալը շատ բարդ է, որովհետեւ այս խնդրի առջեւ կանգնած է ողջ աշխարհը եւ այնպես էլ չի, որ կան կանխելու շատ պարզ եւ հասկանալի միջոցներ: Բայց քիչ թե շատ հաջողված ինչ-որ փորձեր արդեն արվել են եւ մյուս երկրների փորձը ցույց է տալիս, որ կարելի էր առնվազն մտածել եւ որոշակի քաղաքականություն մշակել:
Նախ պետք է պարզենք, թե ինչ չի կարելի անել: Այն, ինչ առաջին հայացքից մարդու մտքին գալիս է, դա ինչ-որ բաներ արգելել փորձելն է: Կանխելու, արգելելու ցանկացած փորձ միշտ ստեղծելու է այլընտրանքային տարբերակներ՝ կեղծ կամ չճշտված լուրեր տարածելու: Սրա դեմն առնելու ոչ շատ արդյունավետ, բայց առայժմ գոնե ամենավստահելի միջոցն այն է, որ կառավարությունը նախ եւ առաջ պիտի ստեղծեր հարթակ, որտեղ մարդիկ կգրեին իրենց հարցերը: Եվ համապատասխան ոլորտի փորձագետների խումբը ամեն օր համբերատար ստիպված էր լինելու դրանք բացատրել եւ ինչ-որ ձեւով հիմնավորել կամ փարատել այն կասկածները եւ կեղծ տվյալները, որ շրջանառվում են: Այսպիսի հարթակներ աշխարհի շատ երկրներ, այդ թվում՝ Ռուսաստանը, ստեղծել են:
Երկրորդ. պետք էր ստեղծել այնպիսի հարթակ եւ լավ կլիներ՝ լրատվամիջոցների օգնությամբ, ներգրավել գիտական, փորձագիտական համայնքը, այլ ոչ թե իրենք մեկնաբանեին՝ իշխանության ներկայացուցիչները, քաղաքական գործիչները, վարչապետը դառնար վիրուսոլոգ:
Կարդացեք նաև
Եվ երրորդը, ծրագրավորողների եւ սոցիալական հումանիտար ոլորտի մասնագետների հետ կառավարության նախաձեռնությամբ համագործակցության բացակայությունն է, որ, օրինակ, ֆիլտրվեին միջազգային, հիմնականում, անգլիալեզու հարթակներում առողջությանը վնասող եւ դավադրապաշտական ուսուցում տարածող հոսքերը ուղղակի ֆիլտրում էին»:
Աշոտ ՀԱԿՈԲՅԱՆ
