«Որքանո՞վ ճիշտ կլինի, որ ես ասեմ, թե համացանցում այս կամ այն տեսանյութն ինչպես եմ գնահատում: Մի բան գիտեմ՝ եթե մարդու բերման են ենթարկել, ուրեմն դրա համար բավարար հիմքեր են եղել»,-ԱԺ հատուկ նիստում այսօր անդրադառնալով «Լուսավոր Հայաստան» խմբակցության պատգամավոր Աննա Կոստանյանի ասածին, որ Կապանում մի ոստիկան քաղաքացիական անձի հետ միասին այսօր բերման է ենթարկել դիմակով մի քաղաքացու, ասաց ՀՀ վարչապետ Նիկոլ Փաշինյանը:
Նա համոզմունք հայտնեց, որ ոստիկանությունն այսօր չպետք է վախենա գործել, այլ պետք է իր իրավասության սահմաններում աշխատի դուխով, վստահ եւ օրինական. «Տպավորություն է, թե ոստիկանությունը պետք է պատերի տակ թաքուն ման գա…ոչ, կանոնները խախտողները եւ հանցագործները պետք է պատերի տակով ման գան: Ոնց որ ոստիկանությունը լինի այս երկրի թիվ մեկ թշնամին: Ոչ, «բեսպրեդելն» է թիվ մեկ թշնամին, եւ «բեսպրեդելի» մթնոլորտ տարածողները պետք է մտնեն իրենց ծակերը, իսկ ձեր ասած տեսանյութն ուղարկեք ինձ: Եթե ապօրինություն է, միջոցներ կձեռնարկվեն, բայց ոստիկանությունը պետք է գործի ուժեղ եւ դուխով»:
Վարչապետը նաեւ շեշտեց, որ ոստիկանությունը կոշտ պետք է լինի. «Ի՞նչ է նշանակում, երբ ոստիկանը պահանջում է դիմակ կրել, բայց սկսում են հետը լեզվակռիվ տալ, հոխորտալ: Այո, որտեղ պետք է՝ ուժը հարկավոր է կիրառել, եւ պետք է բերման ենթարկել: Կարծում եմ՝ վերջին երկու տարում ոստիկանությունն ու ԱԱԾ-ն ոմանց նկատմամբ քիչ են ուժ կիրառել, եւ պետք է այնքան ուժ կիրառեն (հեսա շատ շուտով) ոմանց նկատմամբ, որ ծպտունները դուրս չգա»:
Կարդացեք նաև
Հիշեցնենք, որ կորոնավիրուսի տարածմամբ պայմանավորված՝ կառավարության որոշմամբ արտակարգ դրության ժամկետն այսօր երկարեցվեց մինչեւ հուլիսի 13-ը, եւ օրենքի ուժով գումարվում է ԱԺ հատուկ նիստ:
Լուիզա ՍՈՒՔԻԱՍՅԱՆ
