Ոստիկանության Արաբկիրի բաժանմունքում էր նաև «Լուսավոր Հայաստան» խմբակցության պատգամավոր Գևորգ Գորգիսյանը։ Նա հանդիպել էր բերման ենթարկված «Իրավական ուղի» Հ/Կ հիմնադիր Ռուբեն Մելիքյանին և նրա գաղափարակիցներին, որոնց եւս ոստիկանությունը բերման էր ենթարկել։
Լրագրողների հետ զրույցում Գևորգ Գորգիսյանը ասաց, որ ամեն ինչ նորմալ է շուտով նրանց բաց կթողնեն․ «Եթե մարդիկ, պահպանելով սոցիալական հեռավորությունը, փորձում են իրենց բողոքի ձայնը արտահայտել, որևէ կերպ չի նշանակում խախտել պարետատան սահմանած ռեժիմը։ Որովհետև պարետատան որոշման մեջ ասվում էր՝ կրել դիմակներ, պահպանել սոցիալական հեռավորությունը, և եթե քաղաքացիները ինչ-որ կերպ դա անում են, դրանով արտահայտելով իրենց բողոքի ձայնը, ուրեմն՝ դրան որևէ կերպ խոչընդոտել չի կարելի ու չպիտի թույլատրելի լինի այդ խոչընդոտումը»։
Նա նկատեց, որ նույն կերպ վերջերս շատ ավելի բազմամարդ միջոցառումներ կատարվեցին՝ պահպանելով կանոնները․ «Սա միանշանակ երկակի ստանդարտների կիրառում է, և սա անթույլատրելի է»։
Ամի ՉԻՉԱԿՅԱՆ
