«Վերակենդանացման բաժանմունքներում ընտանեկան մթնոլորտ է: Բոլորն ասում են միայն շնորհակալական խոսքեր: Խնդիրն առողջապահական համակարգում չէ, այլ մեր տներում, թաղերում, «բեսեդկաներում», այգիներում,-ԱԺ հատուկ նիստում այսօր հայտարարեց ՀՀ վարչապետ Նիկոլ Փաշինյանը:
Նա պատմեց. «Այսօր առավոտ աշխատանքի գնալիս մեքենայի պատուհանից տեսա, որ Պռոշյան փողոցի վրա 40-50 տարեկան 3 տղամարդ համարյա փոր փորի տված զրուցում էին՝ դիմակներն իջեցրած վիճակում: Այսինքն, դիմակը ոչ թե նրա համար է, որ կորոնավիրուսից պաշտպանվեն, այլ նրա համար, որ ոստիկանին տեսնելուն պես բարձրացնեն քթի՞ն»:
Հիշեցնենք, որ կորոնավիրուսի տարածմամբ պայմանավորված՝ կառավարության որոշմամբ արտակարգ դրության ժամկետն այսօր երկարեցվեց մինչեւ հուլիսի 13-ը, եւ օրենքի ուժով գումարվում է ԱԺ հատուկ նիստ:
«Լուսավոր Հայաստանի» պատգամավոր Սրբուհի Գրիգորյանը նկատեց՝ իրենք դեռ երեք ամիս առաջ էին առաջարկել, որ, օրինակ, սուպերմարկետներ առանց ձեռնոցի եւ դիմակի մուտքն արգելվի, մինչդեռ դա միայն հիմա է կիրառվում: Փաշինյանն էլ պատասխանեց, որ դիմակի դեֆիցիտի պայմաններում դա արդարացի որոշում չէր լինի պարետատան կողմից. «Ինձ մի դեպք են պատմել ու վստահեցրել, որ իրական է: Բանկերից մեկի մոտ մի քաղաքացու ասում են, որ առանց դիմակի չի կարող մտնել: Նա էլ մեկ ուրիշի դիմակն է վերցնում, որ մտնի: Հիմա դիմակի տեղական արտադրանք ունենք: Ի դեպ, լուրեր են պտտվում, թե կառավարության անդամները կան այդ գործում, բայց այդպես չէ»:
Կարդացեք նաև
Լուիզա ՍՈՒՔԻԱՍՅԱՆ
