ԱՄՆ-ում փորձարկում են կորոնավիրուսի դեմ դեղամիջոցը, Եգիպտոսը պատրաստվում է բացել զբոսաշրջային որոշ ուղղություններ, իսկ Ռուսաստանում կորոնավիրուսի հաստատված դեպքերի թիվը գերազանցել է կես միլիոնը:
Ջոն Հոփկինսի համալսարանի տվյալներով՝ ԱՄՆ-ում կորոնավիրուսով վարակվածների թիվը գերազանցել է երկու միլիոնը, Բրազիլիայում՝ 805 հազարը, իսկ Ռուսաստանում հաստատված դեպքերի թիվը ավելի քան 511 հազար է:
Առողջապահության համաշխարհային կազմակերպությունը հայտարարել է, որ Ռուսաստանում համավարակի հետևանքով մահացության ցածր ցուցանիշը (6715 մարդ) դժվար է բացատրել: Իսկ Մոսկվայում վստահեցնում են՝ կորոնավիրուսի հետևանքով մահերի վերաբերյալ տվյալները հստակ են: ՌԴ նախագահ Վլադիմիր Պուտինի ներկայացուցիչ Դմիտրի Պեսկովը հայտարարել է, որ մահացության ցածր մակարդակը մեկ բացատրություն ունի, այն է՝ առողջապահական համակարգի արդյունավետությունը, այլ ոչ թե վիճակագրական մանևրումները, ինչպես ենթադրում են որոշ ռուս և արտասահմանցի փորձագետներ:
ԱՄՆ-ում Regeneron Pharmaceuticals ընկերությունը սկսել է մարդկանց վրա փորձարկել հակամարմինների «կոկտեյլ»՝ Covid-19-ի բուժման համար: «Եթե ամեն ինչ լավ անցնի, երկու-երեք շաբաթից կանցնենք երկրորդ փուլին: Մոտ մեկ ամսվա ընթացքում հստակ կիմանանք՝ արդյոք նոր դեղամիջոցն աշխատում է, թե ոչ: Մինչև ամառվա վերջ կարող ենք ունենալ բավարար տվյալներ՝ դեղամիջոցը օգտագործելու համար»,-հայտնել է ընկերության աշխատակիցներից մեկը:
Կարդացեք նաև
Գիտնականները REGN-COV2 հակամարմինների արդյունքները համեմատում են կորոնավիրուսով հոսպիտալացված, ինչպես նաև թույլ արտահայտված ախտանիշներ ունեցող պացիենտների պլացեբո թերապիայի հետ:
Եգիպտոսում էլ հայտարարել են, որ հուլիսի 1-ից թույլատրվում է կորոնավիրուսից առավել քիչ տուժած երկրների քաղաքացիների մուտքը երկիր: Բացվելու են Շարմ էլ Շեյխ, Դահաբ, Հուրգադա և մի քանի այլ հանգստավայրեր:
Միևնույն ժամանակ Առողջապահության համաշխարհային կազմակերպությունը նախազգուշացրել է, որ Աֆրիկայում համավարակի տարածումը, որը մինչ այս պահը կորոնավիրուսից ամենաքիչ տուժած աշխարհամասն էր, նոր թափ է հավաքում:
Պատրաստեց՝ Վիկտորյա ԱՆԴՐԵԱՍՅԱՆԸ
