Հայտնի կոմպոզիտորների ոչ անհայտ թուլությունները
Բոլոր մարդիկ ինչ-ինչ նախասիրություններ են ունենում: Հայտնի երաժիշտներն ու կոմպոզիտորները եւս այդ առումով բացառություն չեն: kulturologia.ru-ն առանձնացրել է նրանցից մի քանիսին:
Օրինակ, Սերգեյ Պրոկոֆեւը դեռ երեխա ժամանակվանից շախմատով էր հետաքրքրված: Նա մինչեւ կյանքի վերջ շախմատ խաղաց: Պրոկոֆեւը նույնիսկ առաջին կարգ ուներ:
Շատերը հիշում են Դավիդ Օյստրախի եւ նրա հայտնի պարտիան, որը ժամանակին մեծ թվով հանդիսատես հավաքեց:
Ասում են, երբ հիվանդ ժամանակ նրան այցելել է հայտնի շախմատիստ Միխայիլ Բոտվիննիկը, կոմպոզիտորի ինքնազգացողությունը լավացել է, եւ նա հետաքրքրվել է՝ արդյոք Բոտվիննիկը բերե՞լ է խոստացած ամսագիրը՝ շախմատային նորություններով:
Կարդացեք նաև
Ջոակինո Ռոսինին տարված էր խոհարարությամբ, նա համատեղում էր երաժշտությունն ու խոհարարությունը: Ռոսինիի սիրելի համադրությունը՝ Ֆու-ագրա եւ տրյուֆել, արդեն կոմպոզիտորի անունով մտել է խոհարարության պատմության մեջ:
Սերգեյ Ռախմանինովը հայտնի է տեխնիկայի հանդեպ իր ունեցած մեծ սիրով: Նա առաջիններից մեկն էր, որի տանը վերելակ կար եւ օգտվում էր փոշեկուլից: Նա երեխայի նման ուրախանում էր՝ գործարկելով խաղալիք երկաթգծով գնացող գնացքները: Ռախմանինովը հատկապես ավտոմեքենաների սիրահար էր, դրանք փոխում էր ամեն տարի:
Ավտոմեքենաների սիրահար էր նաեւ Ջակոմո Պուչինին, առաջին ավտոմոբիլը նա ձեռք բերեց 1900 թվականին: Նա սիրում էր արագ վարել, ինչի պատճառով նույնիսկ վթարի ենթարկվեցին ընտանիքով: Նա հաճախ էր գնում ձկնորսության, առագաստանավ թիավարում:
Ալեքսանդր Բորոդինն ուղղակի տարված էր քիմիայով: Նա մեծ հարգանք էր վայելում քիմիկոսների շրջանում: Կոմպոզիտորը քիմիական լաբորատորիա էր ղեկավարում եւ ուներ պրոֆեսորի կոչում, բայց զուգահեռ հրաշալի երաժշտություն էր ստեղծում:
Միխայիլ Գլինկան տաղանդավոր էր ոչ միայն երաժշտության ասպարեզում, նա վեց լեզվի էր տիրապետում, նաեւ հետաքրքրված էր աշխարհագրությամբ: Գլինկայի ամենամեծ «մոլություններից» մեկը ճամփորդելն էր:
Դմիտրի Շոստակովիչը մեծագույն ֆուտբոլասեր էր, նա որեւէ ֆուտբոլային խաղ բաց չէր թողնում, անգիր գիտեր բոլոր ֆուտբոլիստների անունները եւ լավագույն գոլերի հեղինակներին: Նա անգամ հոդվածներ է գրել ֆուտբոլի մասին, որոնք հրապարակվել են մամուլում: Ստացվում է, որ տաղանդավոր մարդը տաղանդավոր է բոլոր ոլորտներում:
Պատրաստեց
Գոհար ՀԱԿՈԲՅԱՆԸ
«Առավոտ» օրաթերթ
11.06.2020
