Պետական եկամուտների կոմիտեի նորանշանակ նախագահ Էդվարդ Հովհաննիսյանը չորս տարի առաջ Կենտրոն վարչական շրջանում ձեռք է բերել բնակարան: Այս մասին տեղեկանում ենք Կոռուպցիայի կանխարգելման հանձնաժողովի հրապարակած ՊԵԿ ղեկավարի հայտարարագրից: Բնակարանը համատեղ սեփականությամբ է գտնվում է բազմաբնակարան շենքում, բայց արժեքը նշված չէ: Էդվարդ Հովհաննիսյանը հայտարարագիրը ներկայացրել է այս տարվա մայիսին, երբ դեռ զբաղեցնում էր ՊԵԿ նախագահի տեղակալի պաշտոնը:
Հովհաննիսյանի հայտարարագրից տեղեկանում ենք, որ տարեսկզբին ունեցել է 2001 թվականի արտադրության «BMW» մակնիշի ավտոմեքենա, որը ձեռք է բերել 2013 թվականին, սակայն հաշվետու տարվա ավարտին ավտոմեքենան այլեւս առկա չի եղել: Սակայն, նույն տարվա վերջում ՊԵԿ նախագահի տեղակալը նվեր է ստացել 2014 թվականի արտադրության «MERCEDES-BENZ» մակնիշի ավտոմեքենա: Հաշվետու տարում՝ 2019 թվականին Էդվարդ Հովհաննիսյանի բանկային հաշիվների մնացորդը կազմել է 1 միլիոն 105 հազար, տարեվերջին՝ 765 հազար, սակայն այս գումարի արժույթը նշված չէ, ծագման աղբյուրը՝ նույնպես:
Կանխիկ գումար ՊԵԿ նորանշանակ նախագահը նույնպես հայտարարագրել է տարեսկզբին ունեցել է 8 միլիոն 700 հազար դրամ, տարեվերջին՝ 5 միլիոն 300 հազար դրամ:
ՊԵԿ պաշտոնյայի հայտարարագրած այլ ֆինանսական միջոցները վարձատրություն են աշխատանքի դիմաց: Վարձատրության գումարը կազմել է 14 միլիոն 531 հազար դրամ: Հայտարարագրից նաեւ տեղեկանում ենք, որ Էդվարդ Հովհաննիսյանը Հայաստանի բանկերից մեկից 2 միլիոն 900 հազար դրամ փոխառություն է ստացել իսկ ՀՀ աշխատանքի եւ սոցիալական հարցերի նախարարությունից՝ 100 հազար դրամ միանվագ աջակցություն:
Կարդացեք նաև
Նահապետ Հովհաննիսյանից էլ որպես նվիրատվություն ՊԵԿ նախագահը ստացել է 10 միլիոն 470 հազար դրամ:
Փոխարենը դրամական միջոցներով աղքատ է ՊԵԿ նախագահի տիկնոջ՝ Մադլենա Հայրապետյանի հայտարարագիրը: Նրա անունով հայտարարագրում ո՛չ բնակարան կա ո՛չ՝ ավտոմեքենա: Էդվարդ Հովհաննիսյանի կինն ունի կանխիկ՝ 3 միլիոն 200 հազար դրամ եւ 300 դոլար: ՊԵԿ նախագահի կինը նույնպես իր հայտարարագրում միանվագ վճար նշել է աշխատանքի եւ սոցիալական հարցերի նախարարությունից՝ 500 հազար դրամի չափով:
Լուսինե ԲՈՒԴԱՂՅԱՆ
