Այսօր պարետատան նիստից հետո ճեպազրույցում վարչապետ Նիկոլ Փաշինյանին հարցրեցին՝ «Լուսավոր Հայաստան» կուսակցությունը հայտարարել է, որ կառավարությունը ձախողել է կորոնավիրուսի դեմ պայքարը եւ հայտարարել, որ ձախողողների քաղաքական պատասխանատվության հարցը կբարձրացնեն համավարակից հետո, միաժամանակ ԲՀԿ-ն հայտարարել է, որ կառավարության կազմը 100 տոկոսով պետք է փոխվի՝ ձեր գլխավորությամբ, ինչպե՞ս կարձագանքեք եւ ինչպե՞ս եք տեսնում իրավիճակի լուծումը՝ Նիկոլ Փաշինյանը պատասխանեց. «Համավարակի հաղթահարումից հետո եւ նույնիսկ դրանից առաջ մենք քննության պետք է առնենք շատ քաղաքական ուժերի պահվածքը համաճարակի եւ համավարակի շրջանում:
Պիտի քննենք ու հանրայնորեն գնահատական տանք, թե նրանց գործողություններն ինչքանով են նպաստել երկրում համավարակի հաղթահարմանը եւ ընդհակառակը, ինչքանով են նպաստել համավարակի տարածմանը: Իմաստ կունենա որոշակի քննություն ծավալել՝ հասկանալու, թե քաղաքական որոշակի շրջանակներ կապ ունե՞ն, թե՞ կապ չունեն կեղծ լուրերի տարածման հետ: Հիմա քանի որ շատ է օգտագործվում պատերազմական տրամաբանությունը, զուգահեռ անցկացնելով այս իրավիճակի մեջ, ասեմ, որ ցանկանացած պատերազմում, նույնիսկ ամենաժողովրդավարական երկրներում, պատերազմի ժամանակ քայքայիչ գործողություն ծավալող անձինք եւ ուժերը արժանանում են համապատասխան գնահատականի: Որեւէ մեկը չկասկածի, որ այն ուժերը, որոնց քայքայիչ գործողությունները կլինեն ապացուցելի, արժանանալու են համաժողովրդական գնահատականի: Ինչ վերաբերվում է պարտությանը, ՀՀ-ն կորոնավիրուսի դեմ պայքարում պարտվել է այնքան, որքան պարտվել է աշխարհը՝ ԱՄՆ-ն Ֆրանսիան, Բելգիան, Մեծ Բրիտանիան, ՌԴ-ն, Շվեդիան, Գերմանիան, բազմաթիվ զարգացած ու գերզարգացած երկրներ: Եթե ՀՀ կառավարությունը պարտվել է կորոնավիորւսի դեմ պայքարում, ուրեմն կորոնավիրուսի դեմ պայքարում պարտվել է մարդկությունը եւ քաղաքակրթությունն ընդհանրապես»:
Վարչապետն ասաց, որ մեր երկիրն ունի պրոբլեմներ կորոնավիրուսի դեմ պայքարում, բայց ճիշտ նույնքան պրոբլեմներ, ինչքան ունի ամբողջ մարդկությունը. «Կան ուժեր, որոնք ոչ միայն պրոբլեմ չունեն, այլեւ կյանքը նրանց համար դարձել է ավելի լուսավոր կամ ավելի բարգավաճ ու նրանք իրենց համար վիրուսային այս միջավայրում տեսնում են վերածնվելու հնարավորություն: Շատ կարեւոր է գնահատել այդ վերածննդի բովանդակությունը ու շատ կարեւոր է ովքեր են, որ վատ են զգում կորոնավիրուսի միջավայրում ու ովքեր են, որ լավ են զգում կորոնավիրուսի միջավայրում»:
Զուգահեռներ տանելով այս իրավիճակը պատերազմի հետ՝ Փաշինյանն ասաց, որ սա նույնն է թե 1992-ի փետրվարին ՀՀ-ում սկսեր շարժում այն մասին, որ ՀՀ-ն եւ Արցախը պարտվել են արցախյան ազատամարտում:
Կարդացեք նաև
Վարչապետն ասաց, որ երբ կորոնավիրուսն ավարտվի, կվերցնեն թուղթ ու գրիչը ու կտեսնեն՝ ով որքան է հաղթել ու որքան է պարտվել:
Հռիփսիմե ՋԵԲԵՋՅԱՆ
