«Հայտարարությունը շատ տհաճ ապտակ է ՀՀ արտաքին քաղաքականությանը՝ մասնավորապես եվրոպական ուղղությունով և խորհրդարանական դիվանագիտության տոտալ ֆիասկոյի և սնանկության ախտորոշում»,- ֆեյսբուքյան ուղիղ եթերում հայտարարեց ՀՀԿ փոխնախագահ, ՀՀ ԱԺ արտաքին հարաբերությունների հանձնաժողովի նախկին նախագահ Արմեն Աշոտյանը՝ անդրադառնալով Եվրոխորհրդարանի համազեկուցողների հայտարարությանը:
Հիշեցնենք՝ Հայաստանի և Ադրբեջանի հարցերով Եվրախորհրդարանի համազեկուցողներ Տրայան Բեսեսկուն, Ժելենա Զավկոն, ինչպես նաև Հայաստանի, Վրաստանի և Ադրբեջանի հետ խորհրդարանական համագործակցության կոմիտեի նախագահ Մարիա Կալյուրանդը համատեղ հայտարարություն են ընդունել՝ «Հայաստանի և Լեռնային Ղարաբաղի միջև նոր մայրուղու կառուցման» վերաբերյալ, որտեղ կան մի շարք հակահայկական ձևակերպումներ:
Ըստ Արմեն Աշոտյանի՝ ՀՀ ԱԺ-ն պատշաճ մակարդակով աշխատանք չի տարել իր եվրոպացի գործընկերների հետ, ինչի պատճառով ակնհայտ ադրբեջանական ձևակերպումներ են ի հայտ եկել այս հայտարարության մեջ: Նրա պնդմամբ՝ այդ հայտարարության տակ ստորագրել են երեք պատգամավորներ, բայց երեքն էլ ունեն մանդատ տարածաշրջանային քաղաքականության հետ կապված Եվրոպական խորհրդարանի կողմից, և դրանով է վտանգավոր հայտարարությունը: Այնուհետև շարունակեց. «Դրանով է վտանգավոր այն դիտարկումների շրջանակներում, որ տվյալ պարագայում այս տիպի հայտարարությունները ստեղծում են ոչ հայանպաստ, ոչ բարենպաստ քաղաքական մթնոլորտ և միջավայր ու ՀՀ խորհրդարանական դիվանագիտության սնանկության ախտորոշումն են տալիս»:
ՀՀԿ փոխնախագահը հիշեցրեց՝ վերջին անգամ ԵՄ-ՀՀ միջխորհրդարանական ձևաչափով նիստ տեղի է ունեցել իր՝ արտաքին հարաբերությունների հանձնաժողովի նախագահության օրոք՝ 2018-ի նոյեմբերին՝ Ստրասբուրգում: Ու ասաց. «Գրեթե երկու տարի է ԵՄ-ի հետ ԱԺ-ն ինձնից, մեզնից հետո որևէ ինստիտուցիոնալ աշխատանք չէր տարել: Այս տարի ապրիլի սկզբին ծրագրված էր ԵՄ-ՀՀ խորհրդարանական գործընկերության հանձնաժողովի երկրորդ նիստը Երևանում, որը չեղարկվեց կորոնավիրուսի պատճառով, սակայն հայ խորհրդարանականները պարզապես պարտավոր էին ոչ թե խնդիրը գցել կտուրը, այլ ընտրել նիստի այլ ձևաչափ՝ հեռավար, ինչպես ողջ աշխարհը: Ու փոխանակ ՀՀ ԱԺ-ն ջանքեր գործադրեր, որ նիստը անպայման կայանար գոնե հեռավար, պարզապես նիստը չեղարկել են, և հունիսն է՝ արդեն երկուսուկես ամիս անց, այդ ուղղությամբ որևէ աշխատանք չեն տարել»:
Կարդացեք նաև
Արմեն Աշոտյանը կատարվածը որակում է ՀՀ խորհրդարանական դիվանագիտության և արտաքին քաղաքականությանը հասցված կոշտ ու ցավոտ ապտակ: Այս առիթով ասաց. «Սա ասում եմ ցավով ու զայրույթով, քանի որ իրենք ստացել են լավ ժառանգություն ԵՄ ուղղությունով բոլոր հարթակներում և ձևաչափերում և մյուս կողմից զայրույթս պայմանավորված է նրանով, որ փաստորեն ԵԽ մի շարք պատգամավորներ կամ մեղմ ձևակերպած չեն տիրապետում խնդրին, կամ վստահ եմ, որ կար ադրբեջանական մեծ լոբբիստական հետևանք, ինչի դեմն ի վիճակի չի եղել ՀՀ իշխանությունն առնել՝ իր անգրագիտության, անփորձության, մեծամտության և բազմաթիվ այլ բացասական հատկանիշների պատճառով»:
Արմեն Աշոտյանի կարծիքով՝ այս հայտարարությանը հայկական կողմից պետք է կոշտ արձագանք հետևեր, հայտարարություն ընդունեին, ինչը չեղավ: Նա եզրափակեց. «Սա հերթական դեղին քարտն է, քանի որ զարհուրելի են ձևակերպումները: Դրանք ոչ մի տեսակետով կապ չունեն Մինսկի խմբի համանախագահների բարձրացրած մոտեցումների հետ, 2019-ի կարգավորումների հիմնարար սկզբունքների հետ: Սա ձեռնառնոցի է առհասարակ, և այստեղ կարող ենք և պետք է եվրոպական պատգամավորների մեղավորությունը բացահայտել, իրենց կապերը, աշխատանք տանել այդ ուղղությամբ, բայց չմոռանանք, որ շան գլուխը իրականում թաղված է ՀՀ-ում՝ Երևանում, Բաղրամյան փողոցի վրա, ԱԺ շենքի տակ»:
Տաթև ՀԱՐՈՒԹՅՈՒՆՅԱՆ
