ATP վարկանիշային ցուցակի առաջատար, սերբ թենիսիստ Նովակ Ջոկովիչը հայտարարել է, որ ամենայն հավանականությամբ չի մասնակցի Ամերիկայի բաց առաջնությանը:
«Խաղացողների մեծ մասը, որոնց հետ խոսել եմ, բացասական են տրամադրված մեկնել այնտեղ: Առավել հավանական է, որ իմ մրցաշրջանը կշարունակվի հողածածկ կորտերում»,-ասել է նա:
Արհեստական ծածկով US Open-ի կազմակերպիչները կորոնավիրուսով պայմանավորված խիստ սահմանափակումներ են նախատեսում մասնակիցների համար: Օրինակ, արտերկրից ժամանողների համար 14-օրյա կարանտին, կորտերի սահմանափակ հասանելիություն, ինչը նշանակում է, որ մասնակիցները չեն կարողանա լիարժեք մարզվել: Որոշվել է նաեւ, որ յուրաքանչյուր թենիսիստի հետ մրցավայրում կարող է լինել ընդամենը մեկ ներկայացուցիչ: Սահմանափակված է լինելու նաեւ Նյու-Յորքում տեղաշարժը: Մարզիկներին ստիպելու են տեղավորվել մրցավայրին մոտ գտնվող հյուրանոցներում, արգելելու են գնալ Մանհեթեն:
Աշոտ ՀԱԿՈԲՅԱՆ
