Այսօր կառավարության շենքի մոտ խաղատներից մեկի աշխատակից Գարիկ Կիրակոսյանը միայնակ բողոքի ցույց էր անում. Նա պնդում էր՝ մարտի 21-ից, երբ պարետի որոշմամբ արգելվեց խաղատների գործունեությունը, չի աշխատում եւ այս ընթացքում հարկադիր պարապուրդի համար պետությունից որեւէ աջակցություն չի ստացել:
«Եթե սահմանափակումներ են անում, թող հավասար բոլորի համար անեն: Հիմա խաղատներին, ակումբներին չեն թողնում աշխատեն, ես էլ էդ ոլորտից եմ ու չեմ աշխատում: Ինչո՞ւ»,-ասաց Կիրակոսյանը:
Կիրակոսյանին ոստիկանները հորդորեցին դադարեցնել ցույցը, քանի որ պարետի որոշմամբ հավաքներն արգելված են՝ կորոնավիրուսի համավարակով պայմանավորված երկրում արտակարգ դրություն է հայտարարվել: Ոստիկանները Կիրակոսյանին հինգ րոպե ժամանակ տվեցին, այն լրանալուց հետո հորդորեցին լքել տարածքը, այլապես բերման կենթարկեն:
«Ես պահանջում եմ կառավարությունից մարդ գա, բայց ոչ մեկ չի արձագանքում, հեռախոսազանգերիս չեն պատասխանում, որովհետեւ իրենց էրեխեքի փորը կուշտ է: Ես խնդրում եմ՝ թույլ տան խաղատներն եւ ակումբներն աշխատեն: Էս ոլորտում 1000 աշխատող կա, չեն աշխատում, գումարած նրանց ընտանիքները»,-ասաց քաղաքացին:
Կարդացեք նաև
Կիրակոսյանն ասաց, որ հակաճգնաժամային ծրագրից փորձել է օգտվել. «Բայց որը լրացնում էինք, գրում էր՝ դուք մերժված եք, բա ինչո՞վ ապրենք: Խաղատների ու ակումբների աշխատողները 10 դրամ էլ չեն ստացել»:
Կիրակոսյանը վստահեցրեց՝ խաղատների, ակումբների գործատուներն իրենց աշխատակիցներին տուն առ տուն սննդով ապահովել են.«Բայց ինչքա՞ն կարան անեն, մենք ձրիակեր չենք, ուզում ենք աշխատել: Իրենք էլ չեն աշխատում, եկամուտ չունեն, ինչքա՞ն կարան օգնեն: Թող բացեն, աշխատենք, չենք ուզում գողություն անենք, օրենք խախտենք»:
Քաղաքացին հայտարարեց՝ կառավարությանը նամակ է ուղարկել, եթե սպառիչ պատասխան չստանա, վաղը կառավարության շենքի մոտ կրկին բողոքի ցույց է անելու, այս անգամ մենակ չի լինի.«Ես էդ 1000 հոգուց լիազորված եմ ցույց անել, բոլորս՝ ընտանիքներով գալու ենք ցույց անենք, տեսնենք՝ ինչ են ասելու»:
Նելլի ԲԱԲԱՅԱՆ
