Ավստրալիայի Էկոնոմիկայի և խաղաղության ինստիտուտի վերլուծական կենտրոնը հրապարակել է խաղաղասիրության համաշխարհային վարկանիշը, որը հիմնված է մի շարք ցուցանիշների վրա՝ ապահովություն և անվտանգություն, ընթացիկ հակամարտություններ, ռազմականացում: Փորձագետները երկրներին շնորհում են գնահատականներ՝ 1-ից մինչև 5: Վարկանիշում տեղ է գտել 163 երկիր:
Զեկույցի համաձայն՝ Հայաստանը, նախորդ տարվա համեմատ գրանցելով մեծ առաջընթաց, հայտնվել է 99-րդ հորիզոնականում: Հայաստանի խաղաղասիրության գլոբալ ինդեքսը կազմում է 2.135 կետ, ինչը նշանակում է, որ մեր երկիրը 15 հորիզոնականով բարելավել է դիրքերը։ Նշվում է, որ Հայաստանը մասնավորապես մեծ առաջընթաց է գրանցել ապահովության և անվտանգության բնագավառում, ինչի շնորհիվ վերջին երեք տարում երկրում 35 տոկոսով նվազել է բանտարկյալների թիվը և այժմ կազմում է 76 ազատազրկված՝ 100 հազար մարդու հաշվով: Այպիսով, Հայաստանն այս ցուցանիշով առաջատար է Եվրասիական տարածքում: Երկիրը բարելավել է դիրքերը նաև սպանությունների նվազման, քաղաքական կայունության և ահաբեկչության ազդեցության անկման ցուցանիշներով։
Չնայած զգալի առաջընթացին՝ Հայաստանը, ըստ զեկույցի, հետընթաց է գրանցել մի շարք ցուցանիշներով: Փորձագետները փաստում են, որ թեպետ երկրում քաղաքական անկայուն իրավիճակը բարելավել է, բայց դա տեղի է ունեցել կառավարության միջամտության ավելացման շնորհիվ, ինչի հետևանքով ավելացել է քաղաքական տեռորի մակարդակը: Բացի այդ մեր երկիրը հետընթաց է գրանցել ռազմականացման ոլորտում՝ զենքի ներմուծման ծավալների, ռազմական ծախսերի մեծացման պատճառով:
Հայաստանի հարևաններից Ադրբեջանը վարկանիշում զբաղեցրել է 120-րդ, Վրաստանը՝ 95-րդ, Իրանը՝ 142-րդ, Թուրքիան՝ 150-րդ, իսկ Ռուսաստանը 154-րդ տեղը։ Նշվում է, որ խաղաղասիրության ցուցանիշներն ամենից շատ առաջընթաց են գրանցել Հայաստանի և Ադրբեջանի մոտ: Ըստ զեկույցի հեղինակների՝ պատճառը Ղարաբաղյան հակամարտության հարաբերական կայունացումն է։ Նշվում է, որ վերջին խոշոր, բաց հակամարտությունը եղել է 2016 թվականի ապրիլի քառօրյա պատերազմը։ Բացի այդ զեկույցի հեղինակները փաստում են, որ 2017-2019թթ. հաստատված հրադադարի ռեժիմից և 2018թ. Հայաստանում այսպես կոչված «թավշյա» հեղափոխությունից հետո զգալիորեն բարելավել է երկու երկրների միջև հարաբերությունները: Միևնույն ժամանակ Ադրբեջանը շարունակում է լուրջ խնդիրներ ունենալ սոցիալական ապահովության և անվտանգության ոլորտներում, երկրում բարձր է հանցավորության, քաղաքական անկայունության և տեռորի մակարդակը:
Կարդացեք նաև
Խաղաղասիրության մակարդակով աշխարհում առաջին տեղը զբաղեցնում է Իսլանդիան, որին հաջորդում են Նոր Զելանդիան, Պորտուգալիան, Ավստրիան, Դանիան, Կանադան, Սինգապուրը, Չեխիան, Ճապոնիան, Շվեյցարիան: Իսկ վատագույն տասնյակում են ներառվել Աֆղանստանը, Սիրիան, Իրաքը, Հարավային Սուդանը, Եմենը, Սոմալին, Լիբիան, Կոնգոյի Դեմոկրատական Հանրապետությունը, Կենտրոնական Աֆրիկյան Հանրապետությունը, Ռուսաստանը:
Պատրաստեց՝ Վիկտորյա ԱՆԴՐԵԱՍՅԱՆԸ
