«Օրերս բյուջեում վերաբաշխում է եղել, եւ 9,9 միլիոն դրամ է նախատեսվել՝ ծառայողական մեքենա գնելու համար: Այս նեղ պայմաններում ի՞նչ ծառայողական մեքենայի մասին է խոսքը»,-ԱԺ տարածքային, տեղական ինքնակառավարման, գյուղատնտեսության եւ բնապահպանության հարցերի հանձնաժողովի նիստում 2019թ.-ի պետբյուջեի կատարողականի ներկայացման ժամանակ այսօր Երեւանի քաղաքապետի տեղակալ Հայկ Սարգսյանից հետաքրքրվեց «Լուսավոր Հայաստանի» պատգամավոր Արմեն Եղիազարյանը:
Սարգսյանը պարզաբանեց, որ Դավիթաշեն վարչական շրջանի ղեկավարին ծառայողական մեքենայով ապահովելու մասին է խոսքը. «Վեց ամիս է, ինչ նա անձնական մեքենան է օգտագործում՝ ծառայողականի բացակայության պատճառով: Մոտ քսան օր առաջ վթարվել էր այդ մեքենան՝ աշխատանքի ընթացքում: Մեր պարկն ուսումնասիրելով՝ չգտանք մեքենա, որը կարող էինք վերցնել եւ տալ վարչական շրջանի ղեկավարին: Պարկը կրճատել ենք, բայց կրճատվածներն օգտագործելի չեն»:
Հայկ Սարգսյանը նաեւ նշեց, որ քաղաքապետի ծառայողական մեքենան, օրինակ, մոտ յոթ միլիոն դրամ արժի, վաճառքի է դրված, եւ հին մեքենա պահելը ծախսերի տեսանկյունից արդյունավետ չէ, ուստի հին մեքենաները պահելը ճիշտ չէ. «Իսկ վարչական շրջանի ղեկավարին առանց մեքենա թողնելն արդարացի չէր լինի՝ հաշվի առնելով նրա աշխատանքի բնույթը»:
Լուիզա ՍՈՒՔԻԱՍՅԱՆ
