Այսօր արձանագրվել է կորոնավիրուսային հիվանդացության 350 նոր դեպք, եւ 352 առողջացած, առողջացած քաղաքացիների թիվը գնալով աճում է, ի տարբերություն տաս օր առաջվա դեպքերի: Այս մասին այսօր ֆեյսբուքի իր էջում ուղիղ եթերում ասաց առողջապահության նախարար Արսեն Թորոսյանը: Նա բացատրեց, թե ինչով է պայմանավորված առողջացածների թվի աճը:
Թորոսյանը նշեց՝ մայիս ամսվա կեսերին որոշում կայացվեց անախտանիշ կամ թեթեւ ախտանիշեր ունեցող քաղաքացիներին տեղափոխել տնային խնամքի, հսկողության եւ այլեւս հյուրանոցներում չպահել. «Այդպես մոտ հազար հոգի դուրս է գրվել, նրանք համակարգում չեն նշվել որպես առողջացածներ, նրանք գնացին 14 օրյա ինքնամեկուսացման՝ իրենց տներում, պոլիկլինիկաների բժիշկների հսկողության տակ, որպեսզի նրանց համարեին բուժված: Այդ օրերին մենք բուժված էինք արձանագրում հիվանդանոցներից դուրս գրված եւ կրկնակի բացասական թեստավորում անցած քաղաքացիներին: Այդ 14 օրը մոտենալուն զուգընթաց, առողջության առաջնային պահպանման օղակները ֆիքսում են այդ 14 օրյա ավարտն ու քաղաքացիների բուժման, առողջացման հանգամանքը: Նույնը արվում է նոր դեպքերում, որոնք հիվանդանոցային համակարգ չեն ընդունվում ի սկզբանե, այլ բուժվում են տանը: Հետեւաբար, սա ռազմավարության փոփոխության արդյունքն էր, ոչ թե ճեղքում՝ այս հակահամաճարակային կամ բուժական գործընթացի»:
Թորոսյանը նշեց՝ այն, ինչ ասում է, չի նշանակում, որ քաղաքացիները զգոնությունը պետք է կորցնեն, պետք է շարունակել պաշտպանիչ բոլոր միջոցառումները՝ կրել դիմակներ, պահպանել սոցիալական հեռավորություն, ձեռքերը պարբերաբար լվանալ եւ ախտահանիչ միջոցներ կիրառել. «Մենք էլ՝ բուժական միջոցառումները շարունակենք: Մենք չպետք է թուլանանք այսօրվա ցուցանիշով, պետք է հետեւել մի քանի օրերի արդյունքներին: Թեկուզ շատ տրիվիալ ու հոգնեցուցիչ հնչող այդ կանոնները մեզ թույլ են տալու հարաբերականորեն նորմալ ու չլարված ապրել մինչեւ վիրուսը նահանջի կամ պատվաստանյութ հայտնաբերվի, կամ դեղորայքային բուժում»:
Այս պահին,ըստ նախարարի, ծանր եւ ծայրահեղ ծանր հիվանդների թիվը մեծ է. «Մենք նոր ծավալների շնորհիվ դեռ կարողանում ենք քաղաքացիներին հոգ տանել, բայց դա չի նշանակում, որ նորից պետք է թուլանանք ու վարքագծային նախորդ վիճակին վերադառնանք»:
Նախարարն ասաց՝ պատրաստ եղեք, վաղը բուժվածների մեծ թիվ է լինելու, բայց նրանք տանն են, հարաբերական թեթեւ կամ անախտանիշ քաղաքացիներն են. «Նրանց մեջ կան ծանր, երկարատեւ բուժումից հետո հիվանդանոցներից դուրս գրվածները, բայց մեծ տոկոս չեն: Այլ տարբերակ չունեինք այս թիվը ֆիքսելու, որովհետեւ տնային բուժում ստացող քաղաքացիները վերջնական թեստավորում չեն անցնում, նրանք համարվում են բուժված 14-օրյա իրենց հսկողությունը լրանալուն պես, եթե հոսպիտալացման կարիք չի լինում»:
Մանրամասն՝ տեսանյութում
Նելլի ԲԱԲԱՅԱՆ
