Դատական համակարգի ծանրաբեռնվածությունը շարունակում է ցավոտ հարց մնալ եւ տարեցտարի այն ավելանում է, հատկապես՝ քաղաքացիական գործերով: Այս մասին ԱԺ պետաիրավական հարցերի մշտական հանձնաժողովի նիստում ՀՀ պետբյուջեի 2019թ.-ի կատարողականի ներկայացման ժամանակ այսօր ասաց ՀՀ դատական դեպարտամենտի ղեկավար Կարեն Փոլադյանը: Նա տեղեկացրեց. «2019թ.-ի ավարտին ունեցել ենք 170 417 քաղաքացիական գործ, իսկ հունիսի մեկի դրությամբ՝ 117 970: Տարվա կեսին արդեն ունենք նման ցուցանիշ: Տարվա ավարտին մոտ 250-300 հազար գործ կունենանք»:
Կարեն Փոլադյանը համոզմունք հայտնեց, որ դատավորների թվի ավելացմամբ այս խնդիրը չի լուծվելու. «Պետք է մեխանիզմներ ներդրվեն՝ ծանրաբեռնվածությունը թուլացնելու եւ դատարան մուտքագրվող գործերը տեսակավորելու համար: Գործերի 80%-ը բանկերի եւ վարկային կազմակերպությունների հայցադիմումներն են, եւ եթե օրենսդրական փոփոխություններով հնարավորություն ստեղծվի, որ այդ գործերը դատարան չբերվեն, դատավորների թվի ավելացումն այդ դեպքում արդյունավետ կլինի»:
Փոլադյանը նաեւ ուշագրավ տվյալ հայտնեց՝ վարչական դատարանում, օրինակ, բողոքներ կան, որոնց քննությունը հաջորդ տարի աշնանն է նշանակված, եւ դատավորների թվի ավելացումն այս փուլում միայն կարճաժամկետ լուծում կարող է լինել:
Լուիզա ՍՈՒՔԻԱՍՅԱՆ
