«Հունիսին լրացավ ՍԴ դատավոր Վահե Գրիգորյանի պաշտոնավարման մեկ տարին: Որքանով տեղյակ եմ՝ որեւէ գործառույթ չի իրականացրել, բայց պարտաճանաչ ձեւով ստացել է աշխատավարձ, պարգեւավճար, օգտվել ծառայողական մեքենայից, աշխատասենյակից: Մեկ տարում մոտ 15 միլիոն դրամ աշխատավարձ է ստացել, իսկ իրեն մակագրված գործերը չի կատարել: Կհաստատե՞ք կամ կհերքե՞ք այս տեղեկությունները»,-ԱԺ պետաիրավական հարցերի մշտական հանձնաժողովի նիստում ՀՀ պետբյուջեի 2019թ.-ի կատարողականի ներկայացման ժամանակ այսօր սահմանադրական դատարանի աշխատակազմի ղեկավար Էդգար Ղազարյանից հետաքրքրվեց «Լուսավոր Հայաստան» խմբակցության պատգամավոր Աննա Կոստանյանը:
Ղազարյանը նշեց, որ աշխատավարձի չափի վերաբերյալ տեղեկատվությունը կարող են տալ գրավոր՝ թվերի մեջ չսխալվելու համար: «Այո, դատավոր Վահե Գրիգորյանը պաշտոնը ստանձնելուց հետո չի մասնակցել ՍԴ որեւէ նիստի, որեւէ աշխատակարգային նիստի, ընդգրկված չի եղել դատական կազմում, իրեն մակագրված գործերի նախնական ուսումնասիրությունների արդյունքների վերաբերյալ հաղորդումներ չի հղել ՍԴ-ին, չի նախապատրաստել որոշման նախագծեր եւ այլ նյութեր՝ այն գործերով, որոնցով նշանակված է եղել համազեկուցող: Իսկ աշխատավարձերն իրավունքի ուժով վճարվում են, եւ մենք դա պարկեշտությամբ ենք արել»,-հավելեց Էդգար Ղազարյանը:
Նրա փոխանցմամբ՝ հաշվի առնելով հարցի հանրային հնչեղությունը, ՍԴ նախագահի կարգադրությամբ Վահե Գրիգորյանը չի ստացել հավելավճարները, իսկ դրանց չափը կրկին կարող է ներկայացնել գրավոր դիմումին ի պատասխան:
Լուիզա ՍՈՒՔԻԱՍՅԱՆ
