«Նախորդ երեք ամսում ականատես եղանք ապատեղեկատվության մեծ ծավալի, որը գալիս է ոչ թե անհայտ մարդկանցից, այլ հայտնիներից՝ հայտնի կապերով, հայտնի լրատվամիջոցներով, եւ դրա միջոցով ժխտվում են համավարակի հետ կապված փաստերը: Դա չի եղել լուսանցքում, այլ եղել է համակարգված, եւ դրա հետեւանքով, իմ կարծիքով, խախտվել է ոչ միայն մարդկանց տեղեկացված լինելու իրավունքը, այլեւ առողջ լինելու իրավունքը: ՄԻՊ-ն այստեղ որեւէ անելիք, ասելիք ունի՞»,-ԱԺ մարդու իրավունքների պաշտպանության եւ հանրային հարցերի հանձնաժողովի նիստում ՀՀ պետբյուջեի 2019թ.-ի կատարողականի ներկայացման ժամանակ այսօր ՀՀ մարդու իրավունքների պաշտպան Արման Թաթոյանին նման հարցադրում հղեց «Իմ քայլի» պատգամավոր Համազասպ Դանիելյանը:
Թաթոյանը շեշտեց՝ կարեւոր է, որ կորոնավիրուսի համավարակի ժամանակ հանրությունն առաջնորդվի պաշտոնական տեղեկատվությամբ. «Լրատվական դաշտում ինչ տեղեկություն կա եւ որտեղից է գալիս, դա բացահայտելը ՄԻՊ գործառույթը չէ: Միայն կարող եմ ասել, որ պետությունը նման իրավիճակներում ունի պարտավորություն՝ մարդկանց առավել շատ իրազեկելու, որպեսզի ապատեղեկատվությունը, խեղաթյուրումները ծածկի: Քաղաքացիներին էլ ասեմ՝ շատ կարեւոր է, որ պահպանեն վարակի տարածման կանխարգելման կանոնները, հետեւեն պետական աղբյուրների իրազեկմանը եւ կանխեն ոչ ճիշտ զարգացումները»:
Դանիելյանը պնդեց հարցը՝ մարդու տեղեկացված լինելու եւ առողջության իրավունքը խախտվե՞լ է: Թաթոյանը պատասխանեց՝ եթե կոնկրետ դեպք մատնանշի, կուսումնասիրի, այլապես նման հարցերում ընդհանրական գնահատական տալը ՄԻՊ գործառույթների մեջ չի մտնում:
Լուիզա ՍՈՒՔԻԱՍՅԱՆ
