Նորք ինֆեկցիոն կլինիկական հիվանդանոցում բուժում ստացող կորոնավիրուսով վարակված հիվանդները իրենց սենյակների պատուհանից զրուցեցին վարչապետ Նիկոլ Փաշինյանի հետ։
Հիվանդները գոհ էին պայմաններից և լավ էին գնահատում բուժանձնակազմի աշխատանքը. «Մեղվի պես անընդհատ 24 ժամ պտտվում են։ Շատ հոգատար են»։
Նրանց շրջանում կային նաև բուժանձնակազմի անդամներ, որոնք իրենց աշխատանքի ընթացքում էին վարակվել կորոնավիրուսով։ Նրանք ասացին, որ դուրս գրվելուց հետո շարունակելու են իրենց աշխատանքը։
Նիկոլ Փաշինյանին հետաքրքիր էր, թե ինչպես են վարակվել հիվանդները։ Մի տղամարդ պատասխանեց․ «Շատ գիտենք, դուրս ենք եկել, տեղ ենք գնացել, տենց վարակվել ենք, չենք հիմանում։ Էսօր գլխավոր բժիշկները, պրեզիդենտներն են հիվանդանում, ի՞նչ իմանաս՝ որտեղի՞ց են վարակվում»։
Կարդացեք նաև
Հիվանդները շնորհակալություն էին հայտնում բժիշկներից, ասում էին, որ նրանք չափից շատ հոգատար են․ «Մեր անձնուրաց բժիշկները մինչև վերջ նվիրված են, օրերով տուն չեն գնում։ Մենք ունենք Արշակ Դավիթովիչ, որ մեզ համար աստված է։ Գոհ ենք բոլորից, մեր աստծուց, ձեզնից»։
Վերջում էլ նրանք իրենց աջակցությունը հայտնեցին վարչապետին․ «Առողջացիր, գործեր շատ ունես, պետք լինի, հետևդ կանգնած ենք»։
Այս խոսակցությունից հետո Նիկոլ Փաշինյանը նկատեց, որ հիվանդների տրամադրությունը բարձր է․ «Տրամադրությունն էլ կապ ունի առողջացման տեմպերի վրա»։
https://www.facebook.com/nikol.pashinyan/videos/1224372074575773
Ամի ՉԻՉԱԿՅԱՆ
