Այսօր պարետատան նիստից հետո «Հայկական ժամանակ» օրաթերթի լրագրողը վարչապետ Նիկոլ Փաշինյանին հարցրեց. «Երեկ լուր տարածվեց, որ ՀՀ Զինված ուժերի գլխավոր շտաբի պետ Արտակ Դավթյանն իր առանձնատանը որդու հարսանիքն է կազմակերպել, ժամեր առաջ, վարչապետը հրապարակել է նրան պաշտոնից ազատելու տեղեկությունը, ինչից կարելի է ենթադրել, որ արտակարգ դրության ռեժիմի խախտում է արձանագրվել: Խնդրում եմ մեկնաբանել՝ ինչպե՞ս եք գնահատում բարձրաստիճան զինվորականի կողմից նման արարքն այսպիսի պայմաններում»: ՀԺ-ի լրագրողը նաեւ հետաքրքրվել էր՝ տեղի ունեցածը կապ ունի՞ նաեւ ոստիկանապետի եւ ԱԱԾ տնօրենի ազատումների հետ, նրանք նախօրոք չե՞ն իմացել միջոցառումների մասին, թե իմացել են եւ քայլեր չեն ձեռնարկել:
Ի պատասխան վարչապետն ասաց. «Ես ուզում եմ ասել, որ ճգնաժամը նրանով է ճգնաժամ, որ շատ դեպքերում իրար է խառնում մարդկային, ընկերական, պաշտոնական հարաբերություններ: Ես նախ՝ ուզում եմ երջանկություն մաղթել բոլոր նորապսակներին եւ նաեւ գեներալ-լեյտենանտ Արտակ Դավթյանի որդուն եւ հարսին, հույս ունենալ, որ նրանք երջանիկ ընտանիք կձեւավորեն եւ կրկին ուզում եմ ասել, որ որոշումները, շատ հաճախ, ճգնաժամային իրավիճակներում միանշանակ չեն լինում, բայց գալիս է հասնում է մի գիծ, երբ որ կարգապահությունը, կարգ ու կանոնը արտակարգ դրության եւ երկրի ղեկավարի ասածներից բխող գործողությունների ճշգրիտ եւ անվերապահ կատարումը դառնում է առաջնահերթություն եւ ստանում է առաջնահերթություն՝ մնացած բոլոր հարցերի վերաբերյալ: Ես, իհարկե, ցավում եմ նման զարգացումների համար, բայց, կարծում եմ, որ այս իրավիճակում մեր երկրի անվտանգության շահը, պետական կառավարման որակի կարգապահության շահը պահանջում է կայացնել այսպիսի որոշումներ: Առավել եւս պետական կառավարման բոլոր մարմինները, տեսական ինքնակառավարման բոլոր մարմինները պետք է սեփական օրինակով ի ցույց դնեն ծայրաստիճան եւ անվերապահ կարգապահություն, որպեսզի մենք կարողանանք սեփական օրինակով քաջալերել մեր հայրենակիցներին եւ օր առաջ հաղթահարել այս ճգնաժամը»:
Փաշինյանի խոսքով, չի կարծում, որ պաշտոններից ազատված պաշտոնյաների հայրենիքին ծառայություններ մատուցելու ներուժը սպառված է. « Ըստ իրավիճակի, հնարավոր եմ համարում քննարկել նրանց հետագա ծառայությունների հարցը»:
Լուսինե ԲՈՒԴԱՂՅԱՆ
Կարդացեք նաև
