Հայաստանի հանրապետության իշխանությունները միշտ էլ ստիպված են լինելու կարճ ժամանակում ԱԱԾ-ի եւ Ոստիկանության ղեկավարների փոփոխություն անել: Aravot.am-ի հետ զրույցում նման կարծիք հայտնեց իրավապաշտպան Վարդան Հարությունյանը՝ վարչապետ Նիկոլ Փաշինյանի՝ ԱԱԾ տնօրենի եւ Ոստիկանության պետի նոր նշանակումների մասին:
Իրավապաշտպանի խոսքերով. «Քանի դեռ այդ կառույցների ղեկավարները քաղաքական պաշտոններ չեն, եւ քանի դեռ այդ կառույցների մարդիկ են, որոնք պետք է ծառայեն կառույցին, այլ ոչ թե աշխատեցնեն կառույցը, իշխանությունը միշտ էլ ստիպված է լինելու փոխել նրանց»:
Հարությունյանի կարծիքով՝ ԱԱԾ տնօրենն ու Ոստիկանության պետը պետք է լինեն ոչ համակարգի մարդիկ եւ դա կօգներ, որպեսզի այդ կառույցներն աշխատեն, դա կտար բուն իմաստն այդ կառույցների:
Վերջին շրջանում հեղաշրջման մասին շատ են խոսում, բայց այս կառույցների ղեկավարների փոփոխությունն, ըստ իրավապաշտպանի, դրա հետ կապ չունի: Հարությունյանը հեղաշրջման մասին տեղեկություններ չունի. «Բայց ես գիտեմ մի բան՝ Հայաստանի հանրապետության այսօրվա իշխանությունն ունի բավականին մեծ լեգիտիմություն, դեռեւս վայելում է ժողովրդի համակրանքը, այսօրվա իշխանությանը «գցել» կամ հեղաշրջել, շատ բարդ է լինելու, եւ եթե կան նման ուժեր, որոնք իրենց առաջ նման խնդիր են դրել, ապա հաստատ չեն հաջողելու»:
Կարդացեք նաև
ԱԱԾ տնօրեն Էդուարդ Մարտիրոսյանը հրաժարականի դիմում էր ներկայացրել, այսօր Փաշինյանը նոր տնօրեն է նշանակել Արգիշտի Քյարամյանին, որը ԱԱԾ տնօրենի տեղակալն էր, մինչ այդ նա պետական վերահսկողական ծառայության պետի ժամանակավոր պաշտոնակատարն էր, դրանից կարճ ժամանակ առաջ էլ՝ քննչական կոմիտեի նախագահի տեղակալը:
Ոստիկանության պետ է նշանակվել Վահե Ղազարյանը: Վարչապետի մեկ այլ որոշմամբ էլ Գեներալ-լեյտենանտ Օնիկ Գասպարյանին նշանակել է ԶՈւ Գլխավոր շտաբի պետ: Շտաբի նախկին պետ Արտակ Դավթյանն էլ այսօր պաշտոնանկ եղավ, նա երեկ իր առանձնատանը որդու բազմամարդ հարսանիքն էր նշում՝ երկրում կորոնավիրուսի համավարակով պայմանավորված արտակարգ դրության պայմաններում: Վարդան Հարությունը վստահ է՝ Դավթյանի պաշտոնանկությունը հենց այս հարսանիքի հետ է կապված: Ինքը՝ Դավթյանն այսօր հարսանիքի մասին հայտարարել է՝ որեւէ խախտում չի եղել:,
Նելլի ԲԱԲԱՅԱՆ
