«Սյունիքի մարզի Հացավան գյուղում հինգ օրից ավելի խմելու ջուր չի եղել՝ կորոնավիրուսի համավարակի պայմաններում: Բնակիչները դժգոհ են «Վեոլիա ջրից»,-ՀՀ Ազգային ժողովի տնտեսական հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում այսօր տարածքային կառավարման եւ ենթակառուցվածքների նախարար Սուրեն Պապիկյանի ուշադրությունն այս խնդրի վրա հրավիրեց «Լուսավոր Հայաստանի» պատգամավոր Սրբուհի Գրիգորյանը:
Սուրեն Պապիկյանը պարզաբանեց՝ 24 ժամ չէին կարողանում գտնել, թե վթարի կետը որտեղ է գտնվում. «Հացավանն այդ խողովակաշարի վերջին հատվածում էր գտնվում: Ցավոք, գործ ունենք նաեւ բնակիչների անբարեխիղճ վերաբերմունքի հետ: Երբ որեւէ գյուղում խմելու ջրով կաղամբ են ջրում, վերջին գյուղն այդ ջուրը չի ստանում»:
Նախարարը շեշտեց, որ «Վեոլիա ջրի» հետ աշխատում են խնդրի լուծման ուղղությամբ. «Միասին աշխատում ենք կտրել ապօրինի խողովակները, որպեսզի վերջնակետին էլ ջուր հասցնենք: Խնդիրը կա նաեւ Արարատի մարզում, որտեղ ջուրը ճանապարհի կեսին «կորում» է, մինչդեռ պետք է հասներ վերջին գյուղերին: Մարդկային անբարեխղճությունը երբեմն սահմաններ չունի, եւ ջրի կորուստը որոշ դեպքերում չափազանց շատ է: Առաջիկայում ջրի կորստի հետ կապված հայտարարություններ կանենք»:
Լուիզա ՍՈՒՔԻԱՍՅԱՆ
