2017 թվականի հունիսին ՀՀ ՊՆ N զորամասի մերձակա տարածքում տեղի ունեցած ժամկետային զինծառայող, կրտսեր սերժանտ Վարդան Մելքոնյանի ինքնասպանության դեպքով հարուցված քրեական գործն արդեն դատարանում է:
Այս դեպքով որոշ հանգամանքներ են Aravot.am-ին հայտնի դարձել, որոնք ճշտեցինք Վարդան Մելքոնյանի մորից՝ Կարինե Մանուկյանից: Մասնավորապես, նրանից հետաքրքրվեցինք՝ ինչո՞ւ էր իր դուստրը բանակում գտնվող որդուն ուղարկել «50 օր ինքնասպանությունից առաջ» գիրքը, ի պատասխան հարցին հարցով պատասխանեց. «Գիրքը ինչո՞ւ են հրատարակում, որ կարդան: Երեխեն կարդացել է, դուրը եկել է, հարցրել է՝ կուզե՞ս ուղարկեմ, կարդաս, նա էլ 100 տոկոսով չի կարդացել»:
Կարինե Մանուկյանի համոզմամբ՝ իր որդին ինքնասպանություն չի կատարել, այլ սպանել են, ըստ նրա՝ այդ մասին են վկայում մահացած որդու որոշ մասերի կապտած լինելն ու որդու դաստակների քերծվածքները. «Դատաբժիշկն ասել է, որ այդ վերքերը մահվանից 12 ժամ առաջ են ղել, իսկ 12 ժամ առաջ նա եղել է ոչ թե ճտանոցում, այլ իրենց զորամասում»:
Գործում կան ապացույցներ, որոնք Վարդան Մելքոնյանի կողմնորոշման մասին տեղեկություններ են հայտնում, մասնավորապես, մերկ լուսանկարներ, տեսագրություններ: Այս ամենի մասին Վարդան Մելքոնյանի մայրն իր բացատրությունը տվեց. «Պարզապես երեխա է, կարող է վիդեոներ նայել է, հիմա ո՞ր տղան չի նայում էդպիսի բաներ, իր հեռախոսի մեջ ձայնագրություններ կան… մի հատ իր հետ ծառայող է եղել, երկու, երեք անգամ նկարված է եղել, երկուսում մենակ է եղել, մեկում հետը նա է եղել, նա է նկարել: Այդ տղան էլ պատմել է, որ Վարդանը խնդրել է իրեն նկարել, ինքն էլ նկարել է, ինչ-որ odnoklassniki-ում մի աղջկա պետք է ուղարկեր, բայց նման բան չի եղել, odnoklassniki-ից պատասխան է եկել, որ նման բան չկա»:
Կարդացեք նաև
Ըստ մեր զրուցակցի՝ դատահոգեբանական փորձաքննությամբ նշված է, որ իր տղան եղել է հոգեպես առողջ ու սեռական շեղումները չէին կարող նրան դրդել ինքնասպանության:
Այս դեպքով մեղադրանք է առաջադրվել զինծառայող Հովհաննես Մարգարյանին։ Ըստ մեղադրական եզրակացության՝ նա, հանդիսանալով ՀՀ ՊՆ 55565 զորամասի 1-ին դիվիզիոնի 2-րդ մարտկոցի առաջին հաշվարկի ավագ օպերատոր, պարտադիր ժամկետային զինծառայող կոչումում շարքային զինվորական ծառայության պարտականությունները կատարելու հետ չկապված` ՀՀ ԶՈՒ ներքին ծառայության կանոնագրքի 34-րդ հոդվածով սահմանված իր նկատմամբ զինվորական կոչման բերումով պետ հանդիսացող նույն դիվիզիոնի համազարկային կրակի ռեակտիվ համակարգի մարտկոցի կառավարման բաժանմունքի ավագ ռադիոհեռախոսավար պարտադիր ժամկետային զինծառայող կրտսեր սերժանտ Վարդան Մելքոնյանի մահճակալին մշտապես քնելու իր առաջարկը վերջինիս կողմից մերժելու պատճառով 2017 թվականի հուլիսի 22-ին` ժամը 23:30 սահմաններում նշված զորամասի առաջին դիվիզիոնի կենցաղային սպասարկման սենյակում վիճաբանել է կրտսեր սերժանտ Վ. Մելքոնյանի հետ, որի ընթացքում, խախտելով կարգապահական կանոնագրքի պահանջները, հայհոյանք տալով՝ բռնություն է գործադրել իր նկատմամբ պետ, կրտսեր սերժանտ Մելքոնյանի նկատմամբ, մեկ անգամ հարվածել է վերջինիս դեմքին, որն էլ անզգուշությամբ առաջացրել է ծանր հետևանքներ. տուժող Վարդան Մելքոնյանի մոտ առաջացել է խիստ ընկճված հոգեվիճակ, որի հետևանքով ժամեր անց վերջինս զինվորական գոտիով ծառից կախվելու միջոցով ինքնասպանություն է գործել:
Արփինե ՍԻՄՈՆՅԱՆ
