«Անհամաչափ ուժի կիրառման փաստ ես չարձանագրեցի: Եթե քաղաքացին՝ լինի հպարտ, թե ոչ, չի ենթարկվում ոստիկանության օրինական պահանջին, ու բանը հասնում է նրան, որ համոզման մեթոդն այլեւս արդյունավետ չի, պետք է հարկադրանքի մեթոդը կիրառվի»,-լրագրողների հետ ճեպազրույցում այսօր անդրադառնալով համացանցում ակտիվորեն քննարկվող տեսանյութին, որում Երեւանում ոստիկանները բերման են ենթարկում քաղաքացուն, նա էլ բղավում է, որ խեղդվում է, ասաց «Իմ քայլի» պատգամավոր, ոստիկանության նախկին պաշտոնյա Արմեն Խաչատրյանը:
Տեսանյութը նկարահանողն ասում է՝ «Նայեք, թե մի դիմակի համար ինչ են անում մեր ոստիկանները քաղաքացուն»:
Խաչատրյանը նկատեց. «Տվյալ դեպքում ոստիկանը կիրառել է ձեռքի ծալման եւ բերման ենթարկելու հնարքը, որը, կարծում եմ, իրավաչափ է: Չտեսա, որ ոստիկաններն անտեղի հարվածեն կամ այլ գործողություններ անեն: Պարզապես միջոցներ են ձեռնարկել՝ անձին բերման ենթարկելու համար: Ոստիկանը պարտավոր է դա անել»:
Լուիզա ՍՈՒՔԻԱՍՅԱՆ
