«Գեւորգ Գորգիսյանն անկեղծ չի: Մեղմ կգնահատեմ իր ասածները, որովհետեւ այս մեկ տարում չի եղել դեպք, երբ որեւէ խնդիր լինի: Մենք ի սկզբանե որոշել էինք, որ սա ապաքաղաքական գործընթաց է»,-լրագրողների հետ ճեպազրույցում այսօր անդրադառնալով «Լուսավոր Հայաստանի» պատգամավոր Գեւորգ Գորգիսյանի մեղադրանքներին, թե 2016թ.-ի ապրիլյան ռազմական գործողությունների հանգամանքներն ուսումնասիրող քննիչ հանձնաժողովի վերջին շրջանի աշխատանքում հանձնաժողովի նախագահ, «Իմ քայլի» պատգամավոր Անդրանիկ Քոչարյանն ընդդիմությանը չի ներգրավել, ասաց հանձնաժողովի անդամ, «Իմ քայլի» պատգամավոր Տիգրան Կարապետյանը:
Նրա խոսքով՝ Գորգիսյանը քաղաքական շահարկումների դաշտ է մտել:
«Սկսենք նրանից, որ պարոն Գորգիսյանը երկու նիստի չի մասնակցել, իսկ ուսումնասիրման նյութերը հանձնաժողովի բոլոր անդամներին հասանելի են ցանկացած պահի: Մնացածը քաղաքական շահարկումների դաշտում է: Ընդդիմությունն առաջին օրից մասնակցել է, ուստի պարոն Գորգիսյանին խորհուրդ կտայի հանձնաժողովի աշխատանքին քաղաքական երանգ չտալ: Մենք օբյեկտիվորեն ենք կազմելու զեկույցը»,-վստահեցրեց Տիգրան Կարապետյանը:
Լուիզա ՍՈՒՔԻԱՍՅԱՆ
