Ռուսաստանում պաշտոնյաներ են կալանավորվել՝ ՌԴ-ից Ադրբեջան երկակի նշանակության ռազմական արտադրանք մատակարարելու համար կաշառք վերցնելու գործով: Ինչպես հաղորդում է «Կոմերսանտ»-ը, Մոսկվայի Խամովնիկյան շրջանային դատարանը ձերբակալել է քրեական գործով անցնող երեք անձի, որոնք առնչություն ունեն Արդյունաբերության և առևտրի նախարարության աշխատակցի կողմից կաշառք ստանալու հետ:
Հետաքննության տվյալներով՝ նախարարության ռազմատեխնիկական բաժնի հրամանատար Ռիզվան Գայրբեկովը 4.5 միլիոն ռուբլի է ստացել Նիժնի Նովգորոդի ավիացիոն ընկերության գլխավոր տնօրեն Վասիլի Կլեպալովից՝ Ադրբեջան երկակի նշանակության արտադրանքի մատակարարման համար ընկերությանը արտոնագիր տալու համար: Նշվում է, որ կաշառքի միջնորդ է եղել նրանց ընդհանուր ծանոթը՝ Օտարերկրյա պետությունների հետ ռազմատեխնիկական համագործակցության վարչության պետ Սերգեյ Գարմաշը։
Չնայած այն հանգամանքին, որ կոռուպցիոն գործարքը սկսել են քննել դեռ մարտին, գործի հետ առնչություն ունեցող անձինք կալանավորվել են դատական նիստից ժամեր առաջ: Առաջինը երկու ամսով կալանավորվել է Վասիլի Կլեպալովը, որը մեղադրվում է կաշառք տալու համար: Դատարանը մինչև օգոստոսի 4-ը մեկուսարան է ուղարկել նաև նախարարության աշխատակից Ռիզվան Գայրբեկովին, որը ՌԴ 3-րդ դասի պետական խորհրդական է։
ՌԴ Ռազմատեխնիկական համագործակցության դաշնային ծառայության արտասահմանյան պետությունների հետ ռազմատեխնիկական համագործակցության երկրորդ վարչության պետի տեղակալ Գարմաշը կալանավորումից անմիջապես հետո խոստովանական ցուցմունք է տվել: Նա գտնվում է տնային կալանքի մեջ:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
