«Բյուջեի հանդեպ հին վերաբերմունքն արտահայտվում էր այն բանում, որ իշխանությունների կողմից պետական բյուջեն օգտագործվում էր աշխատավարձի մի մասը վերցնելու կամ կողոպտելու համար»,-այսօր Ազգային ժողովի մշտական հանձնաժողովների համատեղ նիստում ասաց վարչապետ Նիկոլ Փաշինյանը՝ 2019 թվականի պետական բյուջեի կատարման մասին զեկույցի քննարկման ժամանակ: Վարչապետը նիստին մասնակցում էր առցանց:
«Բյուջեն մեր ընդհանուր գրպանն է, որը մենք համատեղ ենք ստեղծում՝ հավաքական խնդիրներ լուծելու համար: Իմ կարծիքով՝ բյուջեի հին եւ նոր ընկալումը այն ջրբաժանն է, որը պետական ժողովրդին առանձնացնում է ոչ պետականից»,-ասաց Փաշինյանը՝ նույն նիստում շնորհակալություն հայտնելով ՊԵԿ արդեն նախկին ղեկավար Դավիթ Անանյանին:
Ինչպես երեկ տեղեկացրել էինք, ՊԵԿ ղեկավարը հրաժարական ներկայացրեց՝ չմեկնաբանելով հեռանալու պատճառը:
Փաշինյանն ասաց. «Քանի որ այնպես ստացվեց, որ այս կատարողականը քննարկում ենք ՊԵԿ նախագահ Դավիթ Անանյանի հրաժարականի պայմաններում, քանի որ նա լքելու է այս պաշտոնը, ես ուզում եմ շնորհակալություն հայտնել նրան այս ընթացքում կատարված աշխատանքի համար»:
Կարդացեք նաև
Ըստ վարչապետի, առաջիկայում ՊԵԿ-ում նոր փոփոխություններ կլինեն. «Հույս ունենք, որ բովանդակային փոփոխությունները, որ սկսվել են պարոն Անանյանի ղեկավարման շրջանում, ավելի կխորանան եւ ընդգրկուն կդառնան»:
Լուսինե ԲՈՒԴԱՂՅԱՆ
